आजरा (प्रतिनिधी) : कोल्हापूर जिल्ह्यातील अग्रगण्य सहकारी संस्थांपैकी एक असलेल्या रामतीर्थ प्राथमिक शिक्षक सहकारी पतसंस्था मर्यादित, आजरा या संस्थेने आर्थिक वर्ष २०२५-२६ मध्ये उल्लेखनीय कामगिरी करत ३५ लाख १९ हजार ९७८ रुपयांचा निव्वळ नफा मिळवला आहे. ही माहिती संस्थेचे अध्यक्ष डॉ. मारुती डेळेकर यांनी दिली.
संस्थेच्या पारदर्शक आणि तंत्रकुशल कारभारामुळे सभासदांचा विश्वास अधिक दृढ झाला असून सर्वच आर्थिक घटकांमध्ये भरीव वाढ दिसून येत आहे. उपलब्ध आकडेवारीनुसार संस्थेच्या ठेवी २१ कोटी ८३ लाख ४२ हजार ३४३ रुपये, कर्ज वाटप १६ कोटी ३६ लाख ७९ हजार ६६७ रुपये, खेळते भांडवल २७ कोटी १२ लाख ८६ हजार १८८ रुपये, गुंतवणूक ८ कोटी ४२ लाख ३४ हजार १२९ रुपये, निधी व फंड ३ कोटी ९ लाख ८७ हजार २२१ रुपये आणि वसूल भाग भांडवल ६३ लाख ५०० रुपये इतके झाले आहे.
सभासदांसाठी आनंदाची बाब म्हणजे संस्थेच्या वतीने कायम ठेवींवर ९ टक्के दराने व्याज देण्याची घोषणा करण्यात आली असून या व्याज वाटपाची सुरुवात ६ एप्रिल २०२६ पासून होणार आहे. पारदर्शक कारभारामुळे ही संस्था ‘विश्वासाचा ब्रँड’ म्हणून ओळख निर्माण करत आहे.
दरम्यान, संस्थेने स्वमालकीच्या भव्य वास्तूच्या उभारणीचा संकल्प हाती घेतला असून विस्ताराच्या दिशेनेही वाटचाल सुरू केली आहे.
या यशाबद्दल अध्यक्ष डॉ. मारुती डेळेकर, उपाध्यक्ष संजय केसरकर, व्यवस्थापक विजय पत्ताडे तसेच सर्व संचालक, सल्लागार, संघटना प्रतिनिधी आणि कर्मचारी वर्गाचे सर्वत्र कौतुक होत आहे.
