कन्नड (प्रतिनिधी) : तालुक्यातील देभेगाव येथील प्रयोगशील तरुण शेतकरी श्री. बाबासाहेब शेषराव लगड यांनी आपल्या मेहनत, जिद्द आणि आधुनिक शेती तंत्रज्ञानाच्या बळावर कृषी क्षेत्रात उल्लेखनीय यश संपादन करत कन्नड तालुक्याचे नाव राज्यस्तरावर उज्ज्वल केले आहे. सोलापूर जिल्ह्यातील मोडनिंब येथे आयोजित दिमाखदार सोहळ्यात त्यांना ‘महाराष्ट्र उत्कृष्ट डाळिंब उत्पादक शेतकरी पुरस्कार’ देऊन सन्मानित करण्यात आले.
हा मानाचा पुरस्कार महाराष्ट्र राज्याचे कृषी अधिकारी श्री. गौसाणे यांच्या हस्ते प्रदान करण्यात आला. राज्यभरातून निवडलेल्या सुमारे २५० प्रगतशील शेतकऱ्यांमधून केवळ ८ उत्कृष्ट उत्पादकांची निवड करण्यात आली होती. यामध्ये बाबासाहेब लगड यांनी प्रथम क्रमांक पटकावत विशेष मान मिळवला.
११ महिन्यांत विक्रमी उत्पादन
बाबासाहेब लगड यांनी साडेतीन एकर क्षेत्रात सुमारे १,८०० डाळिंब झाडांची शास्त्रीय पद्धतीने लागवड केली. योग्य नियोजन, आधुनिक तंत्रज्ञानाचा वापर आणि सातत्यपूर्ण मेहनतीच्या जोरावर त्यांनी अवघ्या ११ महिन्यांत विक्रमी उत्पादन घेतले. १३ महिन्यांच्या बागेतून उच्च प्रतीचे डाळिंब उत्पादन घेतल्याने त्यांच्या कार्याची राज्यस्तरावर दखल घेण्यात आली.
मान्यवरांकडून गौरव
या उल्लेखनीय यशाबद्दल जिल्हा परिषद सदस्य तथा प्रदेश सदस्य प्रा. डॉ. संजय गव्हाणे यांनी बाबासाहेब लगड यांचा विशेष सत्कार केला. यावेळी बोलताना त्यांनी सांगितले की, “ग्रामीण भागातील तरुण शेतकऱ्यांनी आधुनिक तंत्रज्ञानाचा अवलंब केल्यास शेती अधिक फायदेशीर आणि समृद्ध होऊ शकते.”
या पुरस्कारामुळे देभेगावसह संपूर्ण कन्नड तालुक्यात आनंदाचे वातावरण निर्माण झाले असून, बाबासाहेब लगड यांच्यावर सर्व स्तरांतून अभिनंदनाचा वर्षाव होत आहे.
