परभणी (प्रतिनिधी) :-
मानवत तालुक्यातील सावळी येथे दीपस्तंभ प्रतिष्ठान यांच्या विद्यमाने पालकमंत्री सौ. मेघना बोर्डीकर-साकोरे यांच्या अभिष्टचिंतनानिमित्त सोमवार दि. ६ एप्रिल रोजी मोफत भव्य सर्व रोग निदान व शस्त्रक्रिया शिबिराचे आयोजन करण्यात आले आहे. या शिबिराचा गरजू रुग्णांनी लाभ घ्यावा, असे आवाहन आयोजक तथा भाजपाचे माजी जिल्हा उपाध्यक्ष शिवाजीराव बोचरे यांनी केले आहे.
या शिबिराचे उद्घाटन किसान मोर्चाचे प्रदेश सरचिटणीस रघुनाथराव सोळंके यांच्या हस्ते होणार असून, प्रमुख उपस्थिती म्हणून डॉ. केदार खाटिंग, संतोषराव मुरकुटे, जि. प. सदस्य परमेश्वर निर्वळ, कृष्णा शिंदे, पंचायत समितीचे उपसभापती सुरज काकडे, रक्त क्रांती संघटनेचे जिल्हाध्यक्ष मधुकरराव आवचार, शिवसेनेचे तालुकाप्रमुख तथा सावळीचे सरपंच माणिकराव काळे, अशोकराव चव्हाण, सुभाषराव जाधव, संदीप पेन्सलवार आदी मान्यवर उपस्थित राहणार आहेत.
या शिबिरात तज्ञ डॉक्टरांमार्फत सर्व रोगांची मोफत तपासणी व शस्त्रक्रिया करण्यात येणार आहे. मोतीबिंदू, मुतखडा, नपुंसकत्व, कान-नाक-घसा, हाडांचे फ्रॅक्चर, हृदयविकार, कॅन्सर, यकृत, किडनी, डोळ्यांचा तिरळेपणा, अन्ननलिका शस्त्रक्रिया आदी विविध आजारांवर महात्मा फुले जन आरोग्य योजनेअंतर्गत मोफत उपचार उपलब्ध करून देण्यात येणार आहेत.
या शिबिरासाठी पांडुरंग नवघरे व महादेव नवघरे यांच्याशी संपर्क साधावा, असे आवाहन आयोजक शिवाजीराव बोचरे यांनी प्रसिद्धीपत्रकाद्वारे केले आहे.
