नांदेड (प्रतिनिधी) :
वाढत्या महागाईच्या पार्श्वभूमीवर गॅस दरवाढीच्या मुद्द्यावरून वंचित बहुजन आघाडीने आक्रमक भूमिका घेतली असून, ‘नरेंद्र कब मिलेगा सिलेंडर’ या घोषणेसह ६ एप्रिल रोजी नांदेड येथे मोठे आंदोलन छेडण्यात येणार आहे. या आंदोलनाद्वारे केंद्र सरकारच्या धोरणांविरोधात निषेध व्यक्त केला जाणार आहे.
या आंदोलनात जिल्ह्यातील सर्व तालुक्यांमधील रेस्टॉरंट मालक, भोजनालय चालक, वस्तीगृह व्यवस्थापक, छोटे हॉटेल व्यावसायिक, घरगुती गॅस वापरकर्ते तसेच एलपीजीवर चालणारे ऑटो चालक यांनी मोठ्या संख्येने सहभागी व्हावे, असे आवाहन वंचित बहुजन युवा आघाडीचे जिल्हा उपाध्यक्ष दिपक गजभारे यांनी केले आहे.
वंचित बहुजन आघाडीचे राष्ट्रीय अध्यक्ष Prakash Ambedkar यांच्या आदेशानुसार हे राज्यस्तरीय आंदोलन पुकारण्यात आले आहे. ६ एप्रिल २०२६ रोजी सकाळी ११ वाजता नांदेड जिल्हाधिकारी कार्यालयासमोर सर्व पदाधिकारी व कार्यकर्ते एकत्र जमून सरकारच्या धोरणांविरोधात आवाज उठवणार आहेत.
गॅस सिलिंडरच्या वाढत्या किमतींमुळे सर्वसामान्य नागरिकांचे आर्थिक गणित बिघडले असून, या प्रश्नावर सरकारला जाब विचारण्यासाठी नागरिकांनी मोठ्या संख्येने आंदोलनात सहभागी व्हावे, असे आवाहनही गजभारे यांनी केले आहे.
