करकंब (प्रतिनिधी) :
करकंब येथील ग्रामदैवत श्री कनकंबादेवी यात्रा महोत्सवाला चैत्र महिन्यानिमित्त गुरुवारपासून उत्साहात सुरुवात झाली आहे. दरवर्षीप्रमाणे यंदाही विविध धार्मिक, सामाजिक आणि सांस्कृतिक कार्यक्रमांचे आयोजन करण्यात आले असून ग्रामस्थांमध्ये उत्साहाचे वातावरण आहे.
यात्रेनिमित्त गुरुवार दि. २ रोजी पहाटे देवीला अभिषेक करून पूजा करण्यात येणार आहे. सायंकाळी ६ वाजता गावातून देवीचा छबीना व पालखीची वाजतगाजत मिरवणूक काढण्यात येणार असून कनकंबा मंदिर, बस स्टँड, धाकटी वेस मार्गे सोमवार पेठेतील श्री अमरसिंह देशमुख व श्री उजवलसिंह देशमुख यांच्या वाड्यात पालखीचे विधिवत पूजन करण्यात येणार आहे.
शुक्रवार दि. ३ रोजी सकाळी भेदी गाण्यांचा कलगीतुरा कार्यक्रम आयोजित करण्यात आला आहे. तर रविवार दि. ५ रोजी दुपारी ४ वाजता भव्य निकाली कुस्त्यांच्या जंगी फडाचे आयोजन करण्यात आले आहे. सोमवार दि. ६ रोजी सायंकाळी ७ वाजता सागर शिंदे व वैशाली हिवरे यांच्या लोकनाट्य तमाशाचा कार्यक्रम होणार आहे.
या यात्रा महोत्सवाचे आयोजन ट्रस्ट कमिटी व पंच कमिटीच्या वतीने करण्यात आले असून यासाठी पंच कमिटीचे श्री अमोल शेळके, अजितसिंह देशमुख, बाजीराव खाडे, पांडुरंग शेटे, शिवाजी सलगर, राजेंद्र खारे, शंकर राऊत, भीमराव मदने, देविदास काटवटे आदी जण परिश्रम घेत आहेत. तसेच महाप्रसादाचे आयोजन श्री भाजलिंग रामचंद्र देशमुख यांच्या वतीने करण्यात येणार असल्याची माहिती श्री अशोकसिंह देशमुख यांनी दिली.
