धाराशिव (प्रतिनिधी) :
धाराशिव शहर पोलिसांनी जुगारविरोधी मोहिमेत मोठी कारवाई करत पाथ्रुड गल्ली परिसरातील एका ठिकाणी छापा टाकून जुगाराचा अड्डा उध्वस्त केला. या कारवाईत एकूण २ लाख ५६ हजार ७३० रुपयांचा मुद्देमाल व रोख रक्कम जप्त करण्यात आली असून ९ जणांविरुद्ध गुन्हा दाखल करण्यात आला आहे.
उपविभागीय पोलीस अधीक्षक कार्यालय, धाराशिव यांच्या मार्गदर्शनाखाली दि. ९ मार्च २०२६ रोजी मध्यरात्री १२.१० वाजण्याच्या सुमारास ही कारवाई करण्यात आली. धाराशिव शहर पोलीस ठाण्याच्या हद्दीतील पाथ्रुड गल्ली येथे छापा टाकला असता आरोपी तिरट मटका जुगार खेळताना आढळून आले.
पोलिसांनी घटनास्थळावरून जुगाराचे साहित्य तसेच मोठ्या प्रमाणात रोख रक्कम जप्त केली. या प्रकरणी विजय मुकिंददा मद्दे, रफिक लाला शेख, अमिर सत्ता ढांगे, अन्वर कबुली नाईकवाडी, चंद्रकांत मुकींदा मद्दे, विजय श्रीमंत गायकवाड, राजू चंद्रकांत मद्दे, राजू बाबुराव कवळीकर आणि बलभीम जगन्नाथ जाधव या ९ जणांविरुद्ध गुन्हा दाखल करण्यात आला आहे.
सदर आरोपींविरुद्ध महाराष्ट्र जुगार प्रतिबंधक कायद्यान्वये कलम १२ (अ) अंतर्गत धाराशिव शहर पोलीस ठाण्यात गुन्हा नोंदवण्यात आला असून पुढील तपास पोलीस करीत आहेत.
