सेलू (प्रतिनिधी) :
श्रीक्षेत्र घोराड येथील भक्तनिवाससमोरील सिमेंट रस्त्याचे काम निकृष्ट दर्जाचे होत असल्याचा आरोप स्थानिकांकडून करण्यात येत असून या कामावर प्रश्नचिन्ह उपस्थित झाले आहे. मातीवरच थेट काँक्रिटीकरण करण्यात येत असल्याने रस्त्याच्या टिकाऊपणाबाबत शंका व्यक्त केली जात आहे.
सदर रस्त्याच्या कामासाठी नालीपर्यंत साईड पट्ट्यांचे खोदकाम करण्यात आले असले तरी मजबुतीकरणासाठी मातीमिश्रित मुरमाचा वापर केल्याचे दिसून येत आहे. त्यावरच सिमेंट काँक्रिट टाकण्यात येत असल्याने कामाच्या गुणवत्तेबाबत नागरिकांमध्ये नाराजी आहे.
याशिवाय कामासाठी वापरले जाणारे साहित्यही निकृष्ट दर्जाचे असल्याचा आरोप करण्यात येत आहे. या गैरप्रकाराकडे संबंधित वरिष्ठ अधिकाऱ्यांचे दुर्लक्ष होत असल्याचेही बोलले जात आहे. काही स्थानिकांच्या मते, ठेकेदारांना राजकीय पाठबळ असल्यामुळेच अधिकारी याकडे दुर्लक्ष करत आहेत.
या प्रकरणाची तात्काळ चौकशी करून दोषींवर कारवाई करावी, अशी मागणी ग्रामस्थांकडून करण्यात येत आहे.
