नवी मुंबई (प्रतिनिधी) :
नवी मुंबईतील नेरूळ परिसरात ज्येष्ठ नागरिकाची पोलिस असल्याचे भासवून लूट केल्याची धक्कादायक घटना समोर आली आहे. श्री. त्रिलोकीनाथ बन्सल (वय ८४) हे नेहमीप्रमाणे सकाळी फेरफटका मारून वंडर्स पार्क परिसरातून घरी परतत असताना ही घटना घडली.
सकाळी सुमारे ९ वाजताच्या सुमारास तीन अज्ञात व्यक्तींनी स्वतःला पोलीस असल्याचे सांगून बन्सल यांना थांबवले. बाहेर इतके सोने घालून फिरू नये असे सांगत त्यांनी त्यांच्या हातातील सुमारे १२ ग्रॅमची सोन्याची अंगठी आणि १५ ग्रॅमचे सोन्याचे कडे घेतले. काही वेळाने आपली फसवणूक झाल्याचे बन्सल यांना लक्षात आले.
घटनेनंतर परिसरातील नागरिक व मित्रपरिवाराने हळहळ व्यक्त करत बन्सल यांना धीर दिला असून पोलीस तपासातून दागिने परत मिळतील, असा विश्वास व्यक्त केला आहे.
या प्रकारामुळे नागरिकांमध्ये चिंता निर्माण झाली असून पोलिसांकडून वारंवार करण्यात येणाऱ्या जनजागृतीकडे लक्ष देत सतर्क राहण्याचे आवाहन करण्यात येत आहे. अनोळखी व्यक्तींवर सहज विश्वास ठेवू नये तसेच मौल्यवान दागिने घालून फिरताना विशेष काळजी घ्यावी, असेही सांगण्यात येत आहे.
