पाथरी ( प्रतिनिधी) :
पाथरी तालुक्यातील ग्रामीण भागात गुटखा विक्री मोठ्या प्रमाणात सुरू असल्याचे गंभीर चित्र समोर आले आहे. शासनाने बंदी घातलेली असतानाही अनेक किराणा दुकानांमध्ये व फिरत्या विक्रेत्यांमार्फत गुटखा खुलेआम विकला जात असल्याने नागरिकांमध्ये संतापाचे वातावरण आहे.
बाबळगाव, बाबळगाव फाटा, लोणी, गुंज, उमरा, गोंडगाव, अंधापुरी आणि कानसुर या भागांमध्ये काही विक्रेते मोटारसायकल व चारचाकी वाहनांद्वारे गुटखा पुरवठा करत असल्याची माहिती स्थानिकांकडून मिळत आहे. हे विक्रेते थेट दुकानदारांना माल पोहोचवत असल्याने बंदी केवळ कागदावरच असल्याची भावना नागरिकांमध्ये व्यक्त केली जात आहे.
या प्रकारामुळे लहान मुलांमध्ये व्यसनाधीनता वाढत असल्याची गंभीर चिंता पालकांकडून व्यक्त केली जात आहे. काही भागांमध्ये आरोग्याच्या दृष्टीने गंभीर परिणाम, तसेच आजारांचे प्रमाण वाढत असल्याचेही नागरिकांचे म्हणणे आहे.
स्थानिक नागरिकांच्या मते, पाथरी पोलीस स्टेशन हद्दीत हा प्रकार सुरू असतानाही अपेक्षित कारवाई होताना दिसत नाही. त्यामुळे पोलीस प्रशासनाच्या भूमिकेबाबत प्रश्नचिन्ह उपस्थित केले जात आहे.
दरम्यान, पोलीस प्रशासनाकडून वेळोवेळी कारवाई केल्याचा दावा करण्यात येत असला तरी ग्रामीण भागात गुटखा विक्रीवर ठोस नियंत्रण नसल्याचे चित्र आहे. त्यामुळे अन्न व औषध प्रशासन व पोलीस विभागाने संयुक्तपणे विशेष मोहीम राबवून कठोर कारवाई करावी, अशी मागणी नागरिकांकडून जोर धरत आहे.
