पाथरी (प्रतिनिधी) :
पाथरी तालुक्यातील बोरगव्हाण येथील माजी सरपंच परमेश्वर इंगळे, सुरेश इंगळे आणि रामभाऊ इंगळे यांनी शिवसेना (शिंदे गट) मध्ये जाहीर प्रवेश केला असून, या प्रवेशामुळे स्थानिक राजकारणात नवी समीकरणे निर्माण झाली आहेत.
हा प्रवेश सोहळा शिवसेना भवन येथे अल्पसंख्याक प्रदेशाध्यक्ष सईद खान यांच्या प्रमुख उपस्थितीत पार पडला. या कार्यक्रमाला माजी नगराध्यक्ष मुंजाजी भाले पाटील, माजी सभापती सदाशिव थोरात, अशोक गिराम यांच्यासह अनेक मान्यवर उपस्थित होते. यावेळी कार्यकर्त्यांच्या घोषणांनी परिसरात उत्साहाचे वातावरण निर्माण झाले होते.
कार्यक्रमात बोलताना शिवसेना (शिंदे गट) अल्पसंख्याक प्रदेशाध्यक्ष सईद खान यांनी ग्रामीण भागात शिवसेना अधिक मजबूत करण्यावर भर दिला जाईल असे सांगितले. तसेच ग्रामीण विकास हेच पक्षाचे प्रमुख ध्येय असून, गावागावातील सामान्य नागरिकांच्या समस्या सोडवण्यासाठी पक्ष कटिबद्ध असल्याचे त्यांनी स्पष्ट केले.
माजी सरपंच परमेश्वर इंगळे यांनी बोलताना सांगितले की, राज्यातील बदलत्या राजकीय परिस्थिती आणि नव्या नेतृत्वाच्या विश्वासावर त्यांनी शिवसेना (शिंदे गट) मध्ये प्रवेश करण्याचा निर्णय घेतला आहे. पुढील काळात पक्ष संघटन मजबूत करून जनतेच्या प्रश्नांसाठी काम करण्याचा निर्धारही त्यांनी व्यक्त केला.
या प्रसंगी उपस्थित मान्यवरांनी नव्या पदाधिकाऱ्यांचे स्वागत करत त्यांच्या प्रवेशामुळे पक्षाला अधिक बळ मिळेल, असा विश्वास व्यक्त केला. या घडामोडीमुळे स्थानिक राजकीय वातावरण चांगलेच तापले असून आगामी निवडणुकांच्या पार्श्वभूमीवर याकडे महत्त्वपूर्ण राजकीय बदल म्हणून पाहिले जात आहे.
या कार्यक्रमास कृष्णा इंगळे, सिताराम इंगळे, हरिभाऊ इंगळे, छत्रभुज खुडे, तुकाराम धोतरे, वैजनाथ इंगळे, माऊली इंगळे, नागनाथ कदम आदी उपस्थित होते.
