ठाणे प्रतिनिधी :
ठाण्याच्या घोडबंदर-वाघबिल परिसरात महाराष्ट्रातील सर्वात मोठे २,५०० आसनक्षमतेचे नाट्यगृह उभारले जाणार असून, या प्रकल्पाला राज्य सरकारकडून १३८ कोटी रुपयांची अर्थसंकल्पीय तरतूद मंजूर करण्यात आली आहे. ही घोषणा राज्याचे परिवहन मंत्री तथा शिवसेना आमदार प्रताप सरनाईक यांनी शुक्रवारी केली.
या नाट्यगृहाला “निरुपणकार तीर्थरूप डॉ. श्री आप्पासाहेब धर्माधिकारी नाट्यगृह” असे नाव देण्यात आले असून, हा प्रकल्प तीन वर्षांत पूर्ण करण्याचे उद्दिष्ट आहे.
प्रस्तावित सभागृहाची एकूण आसनक्षमता २,५०० असेल. यामध्ये मुख्य सभागृहात १,६०० जागा, तर दोन्ही बाल्कनींमध्ये प्रत्येकी ४५० जागा असतील. दिव्यांग व्यक्तींसाठी १२ जागांचा स्वतंत्र विभाग राखीव ठेवण्यात येणार असून, त्यांच्यासाठी स्वतंत्र लिफ्ट आणि विशेष सुविधा देखील उपलब्ध असतील.
या सभागृहाचा रंगमंच ठाण्यातील गडकरी रंगायतनपेक्षा १२ मीटर उंच असेल, ज्यामुळे मोठ्या नाट्यनिर्मिती आणि भव्य सादरीकरणांना अधिक वाव मिळणार आहे.
७,३०० चौरस मीटर क्षेत्रावर हा प्रकल्प विकसित केला जाणार असून, त्यापैकी सुमारे ६० टक्के जागा मोकळी ठेवण्यात येईल. यामध्ये २,००० चौरस मीटरचा प्लाझा तयार करण्यात येणार असून, सुमारे २,००० लोकांची क्षमता असलेले खुले सांस्कृतिक कार्यक्रम आयोजित करता येतील.
याशिवाय ६५० कार आणि ३०० दुचाकींसाठी बहुमजली पार्किंग सुविधा, तसेच प्रत्येकी १,००० लोकांच्या क्षमतेची दोन भव्य मेजवानी सभागृहे देखील या संकुलात असतील. यामधून परिषदा, सामाजिक कार्यक्रम आणि विविध सांस्कृतिक उपक्रमांना चालना मिळणार आहे.
या प्रकल्पामुळे ठाण्याच्या सांस्कृतिक पायाभूत सुविधांमध्ये मोठी वाढ होणार असून, कलाकारांना आधुनिक आणि भव्य व्यासपीठ उपलब्ध होईल. तसेच शहराच्या सांस्कृतिक व आर्थिक विकासालाही चालना मिळेल, असा विश्वास प्रशासनाने व्यक्त केला आहे.
