नंदुरबार/प्रतिनिधी :
नंदुरबार जिल्ह्याचे पोलिस अधीक्षक श्रवण दत्त यांच्या कारवाईविरोधात आता मध्यप्रदेशातही तीव्र प्रतिक्रिया उमटू लागली आहे. जिल्ह्यातील ९ सामाजिक कार्यकर्त्यांवर करण्यात आलेल्या हद्दपारीच्या कारवाईचा निषेध व्यक्त करत मध्यप्रदेशातील खेतिया व पानसेमल येथील पोलिस ठाण्यांना निवेदन देण्यात आले आहे.
या निवेदनात बिरसा फायटर्स संघटनेच्या पदाधिकाऱ्यांसह विविध सामाजिक कार्यकर्त्यांनी श्रवण दत्त यांच्यावर गंभीर आरोप केले आहेत. राजकीय दबावाखाली, सूडबुद्धीने आणि अधिकाराचा गैरवापर करून ही कारवाई करण्यात आल्याचा आरोप करण्यात आला आहे. तसेच संबंधित हद्दपारी आदेश तात्काळ रद्द करून श्रवण दत्त यांच्यावर कठोर कारवाई करावी, अशी मागणी करण्यात आली आहे.
निवेदनात नमूद केल्याप्रमाणे, इंटरनेशनल आयडॉल तथा बिरसा फायटर्सचे संस्थापक राष्ट्रीय अध्यक्ष सुशिलकुमार पावरा, रविंद्र वळवी, सतीश ठाकरे, गोपाल भंडारी, रोहीदास वळवी, पंकज वळवी, अजय वळवी, दिलीप मुसळदे आणि ॲड. राहूल कुंवर या ९ सामाजिक कार्यकर्त्यांना दोन वर्षांसाठी हद्दपार करण्यात आले आहे.
या कारवाईविरोधात आधीच नंदुरबार जिल्ह्यात तीव्र प्रतिक्रिया उमटली असून, शहादा ॲडव्होकेट्स बार असोसिएशनने निषेध नोंदवला आहे. तसेच जिल्ह्यातील वकिलांनी न्यायालयीन कामकाजावर बहिष्कार टाकत आंदोलन छेडले आहे. आदिवासी समाजातही या निर्णयाविरोधात संताप व्यक्त केला जात आहे.
दरम्यान, संबंधित कार्यकर्त्यांची कोणतीही गुन्हेगारी पार्श्वभूमी नसतानाही त्यांच्यावर कारवाई केल्याचा आरोप होत असून, ही कारवाई असंवैधानिक व बेकायदेशीर असल्याचे निवेदनात म्हटले आहे. त्यामुळे या प्रकरणाची सखोल चौकशी करून न्याय द्यावा, अशी मागणी जोर धरत आहे.
