कडेगाव | प्रतिनिधी
कडेगाव तालुक्यातील तडसर येथे छत्रपती शिवाजी महाराज यांच्या भव्य अश्वारूढ पुतळ्याची ग्रामस्थांच्या हस्ते मोठ्या उत्साहात स्थापना करण्यात आली. ढोल-ताशांच्या गजरात, वारकरी संप्रदायाच्या सहभागात आणि फटाक्यांच्या आतषबाजीतून काढण्यात आलेल्या मिरवणुकीने संपूर्ण गावात उत्सवाचे वातावरण निर्माण झाले.
या पुतळ्याचे लोकार्पण पारंपरिक शिवजयंती निमित्त येत्या १९ एप्रिल रोजी करण्यात येणार आहे.
८० वर्षांची परंपरा आणि ग्रामसभेचा निर्णय
तडसर येथे शिवजयंतीनिमित्त गेल्या सुमारे ८० वर्षांपासून यात्रा भरविण्याची परंपरा आहे. ग्रामस्थांच्या मागणीनुसार सन २०१९ मध्ये ग्रामसभेत छत्रपती शिवाजी महाराजांचा अश्वारूढ पुतळा उभारण्याचा ठराव मंजूर करण्यात आला होता. त्यानंतर सर्व शासकीय परवानग्या घेऊन लोकवर्गणीतून सुमारे ६० लाख रुपयांचा निधी उभारण्यात आला.
११ फूट उंच भव्य पुतळा
या निधीतून कोल्हापूर येथील शिल्पकार संजीव संपकाळ आणि अतुल डाके यांनी ११ फूट ३ इंच उंचीचा आकर्षक अश्वारूढ पुतळा साकारला आहे. पुतळा गावात आणल्यानंतर ढोल-ताशा पथक, वारकरी संप्रदाय आणि शिवभक्तांच्या घोषणांनी परिसर दुमदुमून गेला.
ग्रामस्थांचा उत्स्फूर्त सहभाग
या सोहळ्यात गावातील सर्व समाजघटकातील महिला, तरुण आणि ग्रामस्थ मोठ्या संख्येने सहभागी झाले होते.
ग्रामस्थांनी व्यक्त केले की, “शिवरायांचा हा भव्य पुतळा तडसर गावाच्या वैभवात भर घालणारा ठरेल आणि पुढील पिढ्यांसाठी प्रेरणास्थान ठरेल.”
