दरेगाव | प्रतिनिधी
दरेगाव परिसरातील नागरिकांनी मेकर डेपोची बस सेवा नियमितपणे सुरू करण्याची मागणी जोर धरत आहे. काही काळापासून ही बस सेवा बंद झाल्याने गावकऱ्यांना मोठ्या अडचणींचा सामना करावा लागत आहे.
यापूर्वी मेकर–दरेगाव दरम्यान बस सेवा सुरू होती, मात्र काही कारणास्तव ती बंद करण्यात आली. परिणामी, दरेगाव येथून साखरखेर्डा, शेंदुर्जन, मलकापूर, पांगरा या जवळच्या बाजारपेठांमध्ये जाण्यासाठी नागरिकांकडे कोणताही पर्याय उपलब्ध नाही.
विशेषतः गरीब व सर्वसामान्य प्रवाशांचे हाल होत असून, विद्यार्थ्यांना, शेतकऱ्यांना तसेच रोजंदारी करणाऱ्यांना मोठ्या अडचणींना सामोरे जावे लागत आहे. वेळेवर बस उपलब्ध नसल्याने दैनंदिन कामांवरही परिणाम होत आहे.
गावकऱ्यांनी संबंधित डेपो व्यवस्थापकांनी या समस्येकडे गांभीर्याने लक्ष देऊन तात्काळ बस सेवा पूर्ववत सुरू करावी, अशी मागणी केली आहे.
बस सेवा सुरू झाल्यास प्रवाशांचे हाल कमी होतील आणि परिसरातील दळणवळण सुरळीत होईल, अशी अपेक्षा व्यक्त केली जात आहे.
