माहूर (प्रतिनिधी) – तालुक्यातील बहुचर्चित ईवळेश्वर येथील क्रीडांगण व समपातळीकरणाच्या कामातील कथित भ्रष्टाचार प्रकरण आता आमदार भीमराव केराम यांच्या दरबारात पोहोचले आहे. शालेय व्यवस्थापन समिती सदस्य प्रफुल जाधव यांनी यासंदर्भात निवेदन सादर करत दोषींवर कठोर कारवाई करण्याची मागणी केली आहे.
सन २०२४-२५ अंतर्गत मौजे ईवळेश्वर (ता. माहूर, जि. नांदेड) येथे क्रीडांगण व समपातळीकरणाच्या कामात मोठ्या प्रमाणावर अनियमितता झाल्याचा आरोप करण्यात आला आहे. प्रत्यक्षात काम न करता बिल उचलण्यात आल्याचा गंभीर मुद्दा निवेदनात मांडण्यात आला असून, या प्रकरणाची उच्चस्तरीय चौकशी करून संबंधितांवर कारवाई करावी, अशी मागणी करण्यात आली आहे.
प्रफुल जाधव यांनी यापूर्वी जिल्हा क्रीडा अधिकारी, जिल्हाधिकारी, मुख्य कार्यकारी अधिकारी (जि.प.), शिक्षणाधिकारी तसेच क्रीडा व युवा सेवा विभागाकडेही तक्रार दाखल केली होती. तसेच दि. ९ मार्च २०२६ रोजी तहसील कार्यालय माहूर समोर उपोषणही करण्यात आले होते. या वेळी दि. १० मार्च रोजी जिल्हा क्रीडा अधिकारी जयकुमार टेंबरे यांनी लेखी आश्वासन देत उपोषण सोडवले होते.
दरम्यान, प्रकरणासंबंधीची सर्व कागदपत्रे व पुरावे आमदार भीमराव केराम यांना सादर करण्यात आले असून त्यांनी या प्रकरणाची सखोल चौकशी करून दोषींवर कारवाई करण्याचे आश्वासन दिले आहे. “या भ्रष्टाचारात सहभागी असलेल्या कोणालाही सोडले जाणार नाही,” असे त्यांनी स्पष्ट केले.
या प्रकरणात आमदारांनी स्वतः लक्ष घातल्यामुळे आता पुढे काय कारवाई होते याकडे ईवळेश्वरसह संपूर्ण तालुक्यातील नागरिकांचे लक्ष लागले आहे.
दरम्यान, “या प्रकरणात प्रशासनातील अनेक घटकांनी अनियमितता केल्याचे ठोस पुरावे माझ्याकडे आहेत. जर कारवाई झाली नाही, तर उच्च न्यायालयाच्या छत्रपती संभाजीनगर खंडपीठात रिट याचिका दाखल करू,” असा इशाराही प्रफुल जाधव यांनी दिला आहे.
