अक्कलकोट (प्रतिनिधी) – तालुक्यातील गोगाव येथे ग्रामदैवत श्री कल्लेश्वर महाराज यांच्या यात्रेला सोमवार, दि. ६ एप्रिलपासून उत्साहात सुरुवात होत आहे. यंदाही यात्रा पारंपरिक पद्धतीने आणि मोठ्या जल्लोषात साजरी करण्यात येणार असल्याची माहिती सरपंच वनिता सुरवसे यांनी दिली.
यात्रेच्या पहिल्या दिवशी, दि. ६ एप्रिल रोजी सायंकाळी ८ वाजता मंदिरातून हनुमान मंदिरापर्यंत उत्साही लहान रथ मिरवणूक काढण्यात येणार आहे. दि. ७ एप्रिल रोजी दुपारी १२ वाजता रथावर कळसारोहण होणार असून, सायंकाळी ८ वाजता भव्य रथोत्सव पार पडणार आहे. त्यानंतर रात्री सांस्कृतिक कार्यक्रमांतर्गत कन्नड नाटकाचे आयोजन करण्यात आले आहे.
दि. ८ एप्रिल रोजी दुपारी ३ वाजता जंगी कुस्ती स्पर्धांचे आयोजन करण्यात आले असून, त्याच दिवशी पुन्हा एकदा नाट्यप्रयोग सादर होणार आहे. यात्रेनिमित्त ७ व ८ एप्रिल रोजी महाप्रसादाचीही व्यवस्था करण्यात आली आहे, अशी माहिती देवस्थान ट्रस्टच्या वतीने खजिनदार मधुकर सुरवसे, प्रदीप जगताप, कमलाकर सोनकांबळे यांनी दिली.
यात्रा प्रदूषणमुक्त पद्धतीने साजरी करण्याचे आवाहन आयोजकांकडून करण्यात आले असून, सर्व शासकीय नियमांचे पालन करून भाविकांनी मोठ्या संख्येने उपस्थित राहावे, असे आवाहन अशोक मुलगी व सचिन सुरवसे यांनी केले आहे.
दरवर्षीप्रमाणे यंदाही गोगाव येथील श्री कल्लेश्वर महाराज यात्रा भक्तांसाठी आकर्षण ठरणार असून, पंचकमिटी व ग्रामपंचायतीच्या सहकार्याने यात्रेची जोरदार तयारी पूर्ण झाली आहे.
