अकलूज (प्रतिनिधी) – भारतीय जनता पक्षाच्या स्थापना दिनानिमित्त अकलूज शहरात भव्य मोटारसायकल रॅलीचे आयोजन करण्यात आले होते. ही रॅली जिल्हा परिषद समाजकल्याण सभापती सौ. संस्कृतीताई (वहिनीसाहेब) रामभाऊ सातपुते यांच्या मार्गदर्शनाखाली उत्साहात पार पडली.
या रॅलीत मोठ्या संख्येने कार्यकर्ते व नागरिक सहभागी झाले होते. “राष्ट्र प्रथम” या विचाराने प्रेरित होऊन कार्य करणाऱ्या प्रत्येक कार्यकर्त्याच्या योगदानामुळे माळशिरस तालुक्यात पक्षाची वाटचाल अधिक सक्षम व व्यापक होत असल्याची भावना यावेळी व्यक्त करण्यात आली.
गेल्या ४६ वर्षांपासून त्याग, समर्पण आणि निष्ठेच्या बळावर भारतीय जनता पक्षाने देशाच्या राजकारणात आणि राष्ट्रनिर्माणात भक्कम स्थान निर्माण केल्याचेही यावेळी नमूद करण्यात आले. या प्रवासात परिश्रम घेणाऱ्या सर्व पदाधिकारी व कार्यकर्त्यांचे आभार मानत स्थापना दिनाच्या शुभेच्छा देण्यात आल्या.
या कार्यक्रमाला पक्षाचे पदाधिकारी, कार्यकर्ते तसेच अकलूजमधील नागरिक मोठ्या संख्येने उपस्थित होते.
