आजरा (प्रतिनिधी) : शहरातील सरकारी रुग्णालय परिसरात मधमाश्यांच्या अचानक झालेल्या हल्ल्यामुळे मोठी खळबळ उडाली असून या घटनेत एक वृद्ध नागरिक गंभीर जखमी झाले आहेत. रुग्णालयाच्या पाण्याच्या टाकीवर असलेल्या मधमाश्यांच्या पोळ्यांमधून अचानक थवा बाहेर पडल्याने हा प्रकार घडला.
मिळालेल्या माहितीनुसार, रुग्णालयाच्या पाण्याच्या टाकीवर दोन मोठी मधमाश्यांची पोळी होती. आज अचानक ही पोळी हलल्याने मधमाश्यांचा थवा परिसरात पसरला आणि रुग्णालयात ये-जा करणाऱ्या नागरिकांवर हल्ला चढवला. यामुळे रुग्णालय परिसरात एकच गोंधळ उडाला आणि नागरिकांची पळापळ झाली.
या दरम्यान, तपासणी करून बाहेर उभ्या असलेल्या एका वृद्ध व्यक्तीवर मधमाश्यांनी मोठ्या प्रमाणात हल्ला केला. शेकडो माश्यांनी चावा घेतल्याने त्यांची प्रकृती गंभीर झाली. त्यांना तातडीने प्रथमोपचार देऊन पुढील उपचारासाठी गडहिंग्लज येथील रुग्णालयात हलवण्यात आले.
घटनेनंतर रुग्णालयात येणाऱ्या रुग्ण व नातेवाईकांमध्ये भीतीचे वातावरण निर्माण झाले आहे. या पार्श्वभूमीवर स्थानिक अन्याय निवारण समितीने प्रशासनाकडे तातडीने कारवाई करण्याची मागणी केली आहे. रुग्णालय परिसरातील मधमाश्यांची धोकादायक पोळी तात्काळ हटवावी, अशी मागणी करण्यात आली आहे.
दरम्यान, रुग्णालयासारख्या गर्दीच्या ठिकाणी नागरिकांच्या सुरक्षेचा प्रश्न ऐरणीवर आला असून प्रशासनाने याबाबत त्वरित उपाययोजना करणे आवश्यक असल्याची भावना नागरिकांतून व्यक्त होत आहे.
