आजरा (प्रतिनिधी) – महागोंड (ता. आजरा) येथील आप्पासाहेब गायकवाड हायस्कूलचे मुख्याध्यापक दिपक कांबळे यांना शैक्षणिक क्षेत्रातील उल्लेखनीय कार्याबद्दल मानाचा ‘पद्मभूषण डॉ. जे. पी. नाईक आदर्श शिक्षक पुरस्कार’ जाहीर झाला आहे.
शिक्षण क्षेत्रातील त्यांचा प्रदीर्घ अनुभव, विद्यार्थ्यांच्या प्रगतीसाठी राबवलेले नाविन्यपूर्ण उपक्रम तसेच शाळेच्या सर्वांगीण विकासासाठी दिलेले योगदान यांची दखल घेत त्यांना या प्रतिष्ठेच्या पुरस्काराने सन्मानित करण्यात आले आहे. या यशामुळे महागोंडसह आजरा तालुक्यातील शैक्षणिक वर्तुळात आनंदाचे वातावरण निर्माण झाले असून त्यांच्यावर अभिनंदनाचा वर्षाव होत आहे.
दिपक कांबळे यांच्या मार्गदर्शनाखाली आप्पासाहेब गायकवाड हायस्कूलने शैक्षणिक व सांस्कृतिक क्षेत्रात सातत्याने प्रगती केली आहे. शिस्त आणि आपुलकीचा समतोल राखत त्यांनी विद्यार्थ्यांमध्ये शिक्षणाची आवड निर्माण केली आहे. त्यांच्या या यशामुळे शाळेच्या शिरपेचात मानाचा तुरा रोवला गेला आहे.
या सन्मानाबद्दल बोलताना कांबळे सरांनी हा पुरस्कार शाळेतील शिक्षकवृंद, विद्यार्थी आणि पालकांना समर्पित केला. त्यांच्या या यशाबद्दल व्यवस्थापन समिती, ग्रामस्थ आणि मित्रपरिवाराकडून त्यांचे मनःपूर्वक अभिनंदन करण्यात येत असून, पुढील वाटचालीस शुभेच्छा दिल्या जात आहेत.
