कोळवाडी | प्रतिनिधी : राजीव दहिफळे
तालुक्यातील कोळवाडी येथे श्री संत मोतीराम महाराज व श्री संत माधवबाबा यांच्या कृपाशीर्वादाने १०२ व्या अखंड हरिनाम सप्ताह व ग्रंथराज ज्ञानेश्वरी पारायण सोहळ्याचे आयोजन करण्यात आले आहे. या ऐतिहासिक सोहळ्याची सुरुवात शुक्रवार, १० एप्रिल २०२६ पासून होत असून संपूर्ण गावात भक्तीमय वातावरण निर्माण झाले आहे.
या सप्ताहाचे हे १०२ वे वर्ष असून ‘विठ्ठल विठ्ठल’ नामाच्या गजराने कोळवाडी नगरी दुमदुमून जाणार आहे. सप्ताहाचे प्रेरणास्थान ह.भ.प. विजयानंद महाराज सुपेकर असून त्यांच्या मार्गदर्शनाखाली विविध धार्मिक कार्यक्रमांचे आयोजन करण्यात आले आहे.
दैनंदिन कार्यक्रम:
पहाटे ४ ते ६ काकडा आरती, सकाळी ६ ते ७ विष्णू सहस्त्रनाम, ७ ते ९ ज्ञानेश्वरी पारायण, ९ ते १२.३० तुकाराम महाराज गाथा भजन, दुपारी १.३० ते ३ अन्नदान, ३ ते ४ भावार्थ रामायण, ४ ते ५ प्रवचन, संध्याकाळी ५ ते ७ धूप आरती व हरिपाठ, तर रात्री ९ ते ११ हरिभक्तीपर कीर्तन असे कार्यक्रम होणार आहेत.
सप्ताहात ह.भ.प. ज्ञानेश्वर महाराज पुरी, ह.भ.प. तुकाराम महाराज मुंडे शास्त्री, ह.भ.प. सुदाम महाराज पानेगावकर व ह.भ.प. गोवर्धन महाराज पट्टीवडगावकर यांसारख्या नामवंत कीर्तनकारांची कीर्तने होणार आहेत.
या सोहळ्याची सांगता १७ एप्रिल रोजी होणार असून त्या दिवशी महाप्रसादाचे आयोजन करण्यात आले आहे. तसेच १८ एप्रिल रोजी काल्याचे कीर्तन व दिंडी मिरवणुकीने सप्ताहाचा समारोप होईल.
या धार्मिक सोहळ्यासाठी ग्रामस्थ व फौजी फाउंडेशन कोळवाडी यांच्या वतीने पिण्याच्या पाण्यासह सर्व सोयींची व्यवस्था करण्यात आली आहे. परिसरातील भाविकांनी कीर्तन, प्रवचन व महाप्रसादाचा लाभ घ्यावा, असे आवाहन आयोजकांनी केले आहे.
