परभणी (प्रतिनिधी) : पाथरी तालुक्यातील जिल्हा परिषद रेणापूर शाळेची विद्यार्थिनी कु. अनिता गोपाल टेंगसे हिने लोणावळा येथील नामांकित सरस्वती विद्या अकॅडमीच्या प्रवेश परीक्षेत गुणवत्ता सिद्ध करत उल्लेखनीय यश संपादन केले आहे. तिची अकॅडमीसाठी निवड झाली असून तिचे इयत्ता ६ वी ते १२ वी पर्यंतचे संपूर्ण शिक्षण मोफत होणार आहे.
अनिताने आपल्या मेहनतीच्या जोरावर ही संधी मिळवली असून तिच्या या यशामुळे रेणापूर शाळेचा मान उंचावला आहे. ग्रामीण भागातून येऊन अशा प्रतिष्ठित संस्थेत प्रवेश मिळवणे ही अभिमानास्पद बाब मानली जात आहे.
या यशासाठी तिला मार्गदर्शक शिक्षक श्री. सतीश भुते सर आणि श्री. माणिक किरकिरे सर यांचे मोलाचे मार्गदर्शन लाभले. तसेच तिच्या पालकांनीही दिलेल्या पाठिंब्यामुळे हे यश शक्य झाले.
अनिताच्या या अभूतपूर्व यशाबद्दल गावकऱ्यांकडून तिचे, तिच्या पालकांचे आणि शिक्षकांचे सर्वत्र कौतुक करण्यात येत आहे.
