परभणी (प्रतिनिधी) : ग्रेटर बॉम्बे सायन्स टीचर्स असोसिएशनतर्फे आयोजित करण्यात आलेल्या प्रतिष्ठित ‘डॉ. होमी भाभा बालवैज्ञानिक स्पर्धा २०२५-२६’ मध्ये मानवत येथील नेताजी सुभाष विद्यालयाची इयत्ता सहावीची विद्यार्थिनी ऋचा विनायक बंडे हिने उल्लेखनीय यश संपादन करत कांस्य पदक पटकावले आहे. या यशाबद्दल तिला ‘बालवैज्ञानिक’ ही मानाची पदवी प्रदान करण्यात आली.
छत्रपती संभाजीनगर विभागातून मराठी माध्यमातून शिक्षण घेत असलेल्या ऋचाने या कठीण विज्ञान स्पर्धेत आपल्या बुद्धिमत्तेची छाप पाडली. तिच्या यशामागे शाळेतील विज्ञान शिक्षक गणेश बारहाते सर यांचे मोलाचे मार्गदर्शन लाभले. त्यांच्या मार्गदर्शनाखाली ऋचाने प्रयोगांची तयारी आणि वैज्ञानिक संकल्पनांचा सखोल अभ्यास केला होता.
दि. ५ एप्रिल २०२६ रोजी झालेल्या गौरव सोहळ्यात ऋचाला पदक व प्रमाणपत्र देऊन सन्मानित करण्यात आले.
या यशाबद्दल शाळेचे मुख्याध्यापक संजय लाड यांनी ऋचाचे विशेष कौतुक करत, “हे यश शाळेसाठी अभिमानास्पद असून तिची जिद्द आणि शिक्षकांचे मार्गदर्शन यामुळेच हे शक्य झाले,” असे मत व्यक्त केले.
तसेच संस्थेचे अध्यक्ष अच्युतराव माने, सचिव डॉ. नीलिमा मुळगुंद आणि खजिनदार संदीप शिंदे यांनीही ऋचाचे अभिनंदन केले. तिच्या या यशामुळे संपूर्ण मानवत परिसरातून अभिनंदनाचा वर्षाव होत आहे.
