वैजापूर (प्रतिनिधी) : वैजापूर तालुक्यातील श्रीक्षेत्र चेंडूफळ चौफुली येथे जागृत देवस्थान म्हसोबा महाराजांच्या यात्रेचे दिव्य व भव्य आयोजन मोठ्या उत्साहात पार पडले. परमपूज्य गुरुवर्य राम लखनजी महाराज यांच्या उपस्थितीमुळे संपूर्ण परिसर भक्तिमय झाला होता.
यात्रेनिमित्त सकाळी अभिषेक कार्यक्रम पार पडला. त्यानंतर सायंकाळी ५ ते ६ या वेळेत तरुणांच्या सहभागातून ढोल-ताशांच्या गजरात म्हसोबा महाराजांची भव्य मिरवणूक काढण्यात आली. या मिरवणुकीत मोठ्या संख्येने भाविक सहभागी झाले होते.
सायंकाळी ६ ते ७ या वेळेत गुरुवर्य राम लखनजी महाराज यांचे सुश्राव्य व प्रेरणादायी प्रवचन झाले. त्यांच्या प्रवचनाला उपस्थित भाविकांनी उत्स्फूर्त प्रतिसाद दिला. पंचक्रोशीतील हजारो भाविक दररोज येथे दर्शनासाठी येत असून हे मंदिर श्रद्धेचे प्रमुख केंद्र मानले जाते.
म्हसोबा महाराजांबद्दल परिसरात अपार श्रद्धा असून त्यांच्या कृपेने भक्तांना संमती व आशीर्वाद लाभतो, अशी भाविकांची भावना आहे.
सायंकाळी ७ ते ९ या वेळेत अन्नदानाचे आयोजन करण्यात आले होते. कार्यक्रमासाठी उपस्थित भाविकांनी महाप्रसादाचा लाभ घेतला.
या यात्रेच्या यशस्वी आयोजनासाठी ग्रामस्थ, माता-भगिनी, तरुण वर्ग व सेवेकऱ्यांचे विशेष सहकार्य लाभले. उपस्थित सर्व भाविकांचे ग्रामस्थांच्या वतीने आभार व्यक्त करण्यात आले.
