अकोला : महानगरपालिकेच्या शिवणी उपनगरातील प्रभाग क्र. १४ मध्ये घरकुल योजनेअंतर्गत लाभार्थ्यांकडून सार्वजनिक रस्त्यांवरच बांधकाम केल्याचा गंभीर आरोप स्थानिक नागरिकांकडून करण्यात येत आहे. या प्रकारामुळे भविष्यात नागरिकांना मोठा त्रास सहन करावा लागणार असल्याची भीती व्यक्त होत आहे.
नियमांनुसार घरकुल बांधकाम करताना सार्वजनिक रस्ता, सांडपाणी नाली, पाणीपुरवठा पाईपलाईन यासाठी आवश्यक जागा राखीव ठेवणे तसेच स्वतःच्या मालकीच्या जमिनीतून किमान १.५ फूट जागा सोडणे बंधनकारक आहे. मात्र प्रत्यक्षात या नियमांचे उल्लंघन होत असल्याचे चित्र दिसत आहे.
स्थानिकांच्या म्हणण्यानुसार, संबंधित अधिकाऱ्यांनी धनादेश वितरणापूर्वी बांधकामाची प्रत्यक्ष पाहणी करून ते खरेदीखताप्रमाणे आहे की नाही, याची खात्री करणे आवश्यक होते. मात्र, अतिक्रमण दिसूनही धनादेश वितरित करण्यात आले, असा आरोप नागरिक करत आहेत.
यामुळे “अधिकाऱ्यांकडून अतिक्रमणाला प्रोत्साहन दिले जात आहे का?”, “पाहणी न करता धनादेश वाटप करण्यात आले का?” तसेच “यामध्ये गैरप्रकार झाला आहे का?” असे प्रश्न उपस्थित होत आहेत.
नागरिकांनी प्रशासनाकडे मागणी केली आहे की, भविष्यात अतिक्रमण वाढू नये यासाठी तात्काळ तपासणी करावी, संबंधितांवर कारवाई करावी आणि धनादेश वितरणापूर्वी काटेकोर पाहणी करणे बंधनकारक करावे. तसेच स्थानिक नागरिकांशी संवाद साधून समस्या सोडवण्याचीही गरज व्यक्त करण्यात येत आहे.
