बीड (प्रतिनिधी) : बीड शहरातील नगर रोड परिसरात माजलगाव शहर पोलीस ठाण्यात कार्यरत असलेले पोलीस कर्मचारी बाळकृष्ण जायभाय (वय ४२) यांनी बुधवारी राहत्या घरी गळफास घेऊन आत्महत्या केल्याची धक्कादायक घटना उघडकीस आली आहे. लोकाशा नगर भागातील या घटनेमुळे संपूर्ण जिल्ह्यात खळबळ उडाली असून पोलीस दलात हळहळ व्यक्त होत आहे.
जायभाय यांनी हे टोकाचे पाऊल का उचलले, याचे कारण अद्याप स्पष्ट झालेले नाही. ते यापूर्वी नेकनूर पोलीस स्टेशन तसेच चौसाळा येथील पोलीस चौकीत कार्यरत असताना कर्तव्यदक्षपणे सेवा बजावत होते. COVID-19 pandemic काळात त्यांनी अत्यंत जबाबदारीने कर्तव्य पार पाडले होते. त्यांच्या मनमिळावू स्वभावामुळे सहकाऱ्यांमध्ये त्यांची विशेष ओळख होती.
एक कर्तव्यदक्ष आणि जिवलग सहकारी गमावल्यामुळे पोलीस दलावर शोककळा पसरली आहे. त्यांनी बीड स्थानिक गुन्हे शाखा आणि गेवराई पोलीस ठाण्यातही उल्लेखनीय सेवा दिली होती, त्यामुळे त्यांचा मोठा मित्रपरिवार होता.
घटनेची माहिती मिळताच पोलिसांनी घटनास्थळी धाव घेत मृतदेह शवविच्छेदनासाठी जिल्हा रुग्णालयात पाठवला आहे. या प्रकरणाचा पुढील तपास शिवाजीनगर पोलीस करीत असून परिसरात या घटनेबद्दल तीव्र हळहळ व्यक्त केली जात आहे.
