कुंडलवाडी | प्रतिनिधी :
कुंडलवाडी शहरात घरगुती गॅसचा तीव्र तुटवडा निर्माण झाल्यामुळे नागरिकांना मोठ्या त्रासाला सामोरे जावे लागत आहे. शहरातील कुंभारगल्ली परिसरात असलेल्या ओंकार इंडियन गॅस एजन्सी समोर नागरिकांच्या मोठ्या रांगा लागल्याचे चित्र पाहायला मिळत आहे.
गॅस सिलेंडर मिळवण्यासाठी नागरिकांना तासन्‌तास प्रतीक्षा करावी लागत असून, परिस्थिती नियंत्रणात ठेवण्यासाठी पोलीस बंदोबस्तात गॅस वितरण करण्यात येत आहे. कुंडलवाडीच्या इतिहासात पहिल्यांदाच अशा प्रकारे पोलीस उपस्थितीत गॅस वाटप होत असल्याचे सांगितले जात आहे.
गेल्या अनेक दिवसांपासून गॅस पुरवठा विस्कळीत असल्याच्या तक्रारी नागरिकांकडून होत आहेत. एका सिलेंडरसाठी ३० ते ३५ दिवस प्रतीक्षा करूनही वेळेवर गॅस मिळत नसल्याने अनेक कुटुंबांना पुन्हा चुलीचा आधार घ्यावा लागत आहे.
दरम्यान, शहरातील काही हॉटेल, इडली सेंटर, बिअर बार, रेस्टॉरंट आणि धाब्यांमध्ये घरगुती गॅसचा सर्रास वापर होत असल्याचा आरोप नागरिकांनी केला आहे. नियमांनुसार या व्यावसायिक आस्थापनांनी कमर्शियल गॅसचा वापर करणे अपेक्षित असताना घरगुती गॅसचा वापर होत असल्याने तुटवडा वाढत असल्याची शक्यता व्यक्त केली जात आहे.
नागरिकांनी तालुका व जिल्हा पुरवठा अधिकाऱ्यांनी याकडे गांभीर्याने लक्ष देऊन गॅस वितरण व्यवस्था सुरळीत करावी, तसेच घरगुती गॅसचा गैरवापर रोखण्यासाठी कठोर कारवाई करावी, अशी मागणी केली आहे.
