श्रीगोंदा प्रतिनिधी:
श्रीगोंदा तालुक्यातील आढळगाव येथील जिल्हा परिषद प्राथमिक शाळेसाठी दोन नवीन वर्गखोल्या बांधकामासाठी २४ लाख रुपयांची प्रशासकीय मंजुरी देण्यात आली आहे. जिल्हा परिषद अहिल्यानगरच्या शिक्षण विभाग (प्राथमिक) मार्फत सन २०२५-२०२६ च्या जिल्हा वार्षिक योजनेअंतर्गत हा निधी मंजूर करण्यात आला आहे.
जिल्हा परिषद आदेश क्रमांक कार्या-४/गांध८२४२/२०२६ दिनांक २९ मार्च २०२६ नुसार, प्राथमिक शाळांच्या इमारतींच्या बांधकामासाठी उपलब्ध निधीतून आढळगाव शाळेस दोन वर्गखोल्या उभारण्यास मान्यता देण्यात आली. या योजनेसाठी एकूण २५ कोटी ३६ लाख रुपयांची तरतूद असून, मागील दायित्व वजा केल्यानंतर उर्वरित निधीतून संबंधित कामांना मंजुरी देण्यात येत आहे.
प्रशासकीय आदेशानुसार, काम पूर्ण झाल्यानंतर गटशिक्षणाधिकारी, मुख्याध्यापक व शाळा व्यवस्थापन समितीकडून प्रमाणपत्र मिळाल्यानंतरच देयके अदा केली जाणार आहेत. तसेच खर्च शासनाच्या नियम व मार्गदर्शक तत्वांनुसारच करणे बंधनकारक राहणार आहे. मंजूर रकमेपेक्षा अधिक खर्च न करण्याच्या सूचना देखील देण्यात आल्या आहेत.
या कामासाठी शिक्षणाधिकारी (प्राथमिक) यांच्या संयुक्त स्वाक्षरीनंतरच अंतिम देयक अदा केले जाणार आहे.
दरम्यान, या कामासाठी सरपंच शिवप्रसाद उबाळे, उपसरपंच अनुराधा ठवाळ, माजी जिल्हा परिषद सदस्य अनिल ठवाळ, माजी पंचायत समिती सभापती विलासराव भैलुमे, अंबादास चव्हाण, ग्राम सदस्य हनुमंत डोके, डॉ. डाळिंबे, शाळा व्यवस्थापन समिती सदस्य निलेश डाळिंबे, सचिन शिंदे तसेच मुख्याध्यापक संतोष शिंदे आदींचा सहभाग राहणार आहे.
स्थानिक पातळीवर या मंजुरीचे स्वागत करण्यात येत असून, विद्यार्थ्यांना अधिक चांगल्या सुविधा उपलब्ध होणार असल्याची अपेक्षा व्यक्त केली जात आहे.
