धाराशिव जिल्हा प्रतिनिधी दि. १०. जि.नगरपरिषदेमधील काँग्रेस पक्षाला मोठा धक्का बसला असून, काँग्रेसचे नगरसेवक सिद्धार्थ बनसोडे यांनी आपल्या पदाचा आणि पक्षाचा राजीनामा दिला आहे. स्थानिक पातळीवरील गटबाजी आणि अंतर्गत वादाला कंटाळून हा निर्णय घेतल्याचे त्यांनी आपल्या राजीनाम्यात स्पष्ट केले आहे.
प्राप्त माहितीनुसार, बनसोडे यांनी काँग्रेस (आय) जिल्हा समितीकडे आपला राजीनामा सादर केला. त्यांनी आपल्या पत्रात, “स्थानिक गटबाजीमुळे मी पदाचा मान राखत राजीनामा देत असून पक्ष सोडत आहे,” असे नमूद केले आहे. त्यांच्या या निर्णयामुळे शहरातील काँग्रेस कार्यकर्त्यांमध्ये खळबळ उडाली आहे.
सिद्धार्थ बनसोडे हे धाराशिव नगरपरिषदेत काँग्रेसकडून दोन वेळा नगरसेवक म्हणून निवडून आले होते. तसेच, ते जिल्हा नियोजन समितीचे सदस्य म्हणूनही कार्यरत होते. नगरपरिषदेमध्ये काँग्रेसचे केवळ तीन नगरसेवक उरले आहेत.
दरम्यान, बनसोडे हे आज भारतीय जनता पक्षात प्रवेश करणार असल्याची जोरदार चर्चा राजकीय वर्तुळात रंगली आहे. तसेच, उर्वरित दोन काँग्रेस नगरसेवकही लवकरच भाजपमध्ये प्रवेश करणार असल्याच्या चर्चांना सध्या उधाण आले आहे.
विशेष म्हणजे, 10 एप्रिलपासून धाराशिव जिल्ह्यात काँग्रेस पक्षाच्या मजबुतीकरणासाठी केंद्रीय व राज्यस्तरीय पदाधिकाऱ्यांची आढावा बैठक आयोजित करण्यात आली आहे. या बैठकीच्या तोंडावरच बनसोडे यांच्या राजीनाम्यामुळे काँग्रेसला मोठा धक्का बसल्याचे मानले जात आहे.
एकूणच, धाराशिवमधील या राजकीय घडामोडींमुळे आगामी काळात काँग्रेसची स्थिती आणखी कमकुवत होण्याची शक्यता व्यक्त केली जात आहे.
