आजरा नगरपंचायत:
आजरा | प्रतिनिधी
आजरा नगरपंचायतीमध्ये सध्या सुरू असलेली विकासकामे ही मागील सभागृहातील असून, पालकमंत्री प्रकाश आबिटकर यांच्या माध्यमातून ती मंजूर झाली आहेत. मात्र, विरोधी नगरसेवक केवळ प्रसिद्धीचे ढोंग करून ही कामे आपणच आणल्याचा बनाव रचत आहेत. अशा प्रकारे विरोधक शहरवासीयांची दिशाभूल करत असून कामांचे श्रेय लाटण्याचा प्रयत्न करत आहेत, असा जोरदार आरोप नगराध्यक्ष अशोक चराटी यांनी पत्रकार परिषदेत केला.
विरोधकांचा नवा ‘फंडा’ आणि प्रसिद्धीचे ढोंग
नगराध्यक्ष चराटी यांनी विरोधकांच्या कार्यपद्धतीवर टीका करताना सांगितले की, “विरोधकांनी आता एक नवा फंडा शोधला आहे. एखादे विकासकाम सुरू होण्याच्या अगदी काही दिवस आधी आंदोलनाचा इशारा द्यायचा आणि काम सुरू झाले की आपल्या पाठपुराव्यामुळेच हे काम झाले, असा कांगावा करायचा. कोणतीही विकासकामे एका दिवसात मार्गी लागत नसून, त्यासाठी सत्ताधारी आघाडीचे नगराध्यक्ष व नगरसेवक अनेक दिवसांपासून प्रयत्नशील असतात.”
प्रशासकीय कामात हस्तक्षेप आणि अधिकाऱ्यांवर अरेरावी
नगरपंचायतीच्या कारभारात विरोधकांचा हस्तक्षेप वाढत चालल्याचे सांगत चराटी म्हणाले की, “विरोधी मंडळी केवळ दिखावा करण्यासाठी अधिकाऱ्यांवर अरेरावी करत आहेत. यापूर्वी शहरात अधिकारी नव्हते, मात्र मंत्री प्रकाश आबिटकर यांच्या प्रयत्नांमुळे नगरपंचायतीला अधिकारी मिळाले आहेत. जर विरोधकांच्या अशा वागणुकीमुळे अधिकारी सोडून गेले, तर पुन्हा अधिकारी मिळवणे कठीण होईल. अधिकाऱ्यांवर दादागिरी करण्यापेक्षा नगराध्यक्ष आणि मुख्याधिकाऱ्यांशी चर्चा करून प्रश्न सोडवणे अपेक्षित आहे.”
विकासाचा ध्यास आणि आबिटकरांचे नेतृत्व
शहरातील पाणी, रस्ते आणि कचरा यांसारख्या मूलभूत प्रश्नांची सोडवणूक बऱ्यापैकी करण्यात यश आले आहे. निवडणुकीत दिलेली आश्वासने पूर्ण करण्यासाठी सत्ताधारी गट कटिबद्ध आहे. “नगराध्यक्षांना डावलून विकासकामांचे नारळ फोडण्याची विरोधकांची पद्धत चुकीची आहे. सध्या सुरू असलेली सर्व कामे ही पालकमंत्री प्रकाश आबिटकर यांच्यामुळेच शक्य झाली असून, त्याचे श्रेय केवळ त्यांनाच जाते,” असेही त्यांनी स्पष्ट केले.
समन्वयाचे आवाहन
मागील सभागृहात सत्ताधारी आणि विरोधकांनी समन्वयाने काम केले, ज्यामुळे शहराचा विकास झाला. मात्र, आताचे विरोधक केवळ प्रसिद्धीसाठी नगरपंचायतीला आणि पर्यायाने शहराला बदनाम करत आहेत. भांडत बसण्यापेक्षा समन्वयातून शहराचा विकास साधूया, असे आवाहन अशोक चराटी यांनी शेवटी केले.
या पत्रकार परिषदेला सत्ताधारी आघाडीचे विविध नगरसेवक आणि पदाधिकारी उपस्थित होते.
