लोणी काळभोर | प्रतिनिधी
आषाढी एकादशीच्या निमित्ताने लोणी काळभोर येथील टाईनी हार्ट प्री स्कूल अँड ॲक्टिव्हिटी हब येथे पालखी सोहळा अत्यंत उत्साहात आणि भक्तिमय वातावरणात साजरा करण्यात आला. या निमित्ताने चिमुकल्यांच्या दिंडीचे आयोजन करण्यात आले होते.
यावेळी विद्यार्थ्यांनी विठ्ठल-रुक्मिणी, संत ज्ञानेश्वर, संत तुकाराम, संत मुक्ताबाई आदींची आकर्षक वेशभूषा परिधान करून पालखी मिरवणुकीत सहभाग घेतला. टाळ, मृदुंग, भगवे झेंडे आणि विठ्ठलनामाच्या गजरात परिसर भक्तिमय झाला. “ज्ञानोबा-तुकाराम” या जयघोषाने संपूर्ण वातावरण दुमदुमून गेले.
या उपक्रमांतर्गत सिद्राम मळा परिसरात चिमुकल्यांची पायी वारी काढण्यात आली. तसेच रिंगण सोहळ्याचेही आयोजन करण्यात आले. शाळेत भजन, आरती आणि नामस्मरणाचा कार्यक्रम पार पडला. विद्यार्थ्यांचा उत्साह आणि सहभाग उपस्थितांचे लक्ष वेधून घेत होता.
या उपक्रमातून विद्यार्थ्यांना महाराष्ट्राची समृद्ध वारकरी परंपरा, संतांचे विचार आणि सांस्कृतिक वारशाची ओळख करून देण्यात आली. शिक्षकांनी पालखी सोहळ्याचे महत्त्व मुलांना सोप्या भाषेत समजावून सांगितले.
शाळेच्या संचालिका व शिक्षकांनी विद्यार्थ्यांचे कौतुक करत, अशा सांस्कृतिक उपक्रमांमुळे मुलांमध्ये संस्कार, शिस्त, एकता आणि भारतीय संस्कृतीबद्दल आदरभाव निर्माण होण्यास मदत होते, असे मत व्यक्त केले.
या पालखी सोहळ्याला पालकांनीही उत्स्फूर्त प्रतिसाद दिला. भक्ती, संस्कार आणि सांस्कृतिक परंपरेचा सुंदर संगम अनुभवत हा कार्यक्रम आनंदोत्सवात आणि उत्साहपूर्ण वातावरणात संपन्न झाला.
