नातेपुते : प्रतिनिधी
मतदारसंघातील नातेपुते येथे डॉ. बाबासाहेब आंबेडकर यांच्या जयंतीनिमित्त भीमगीत कार्यक्रम उत्साहात पार पडला. या कार्यक्रमाला स्थानिक नागरिकांचा उत्स्फूर्त प्रतिसाद लाभला.
डॉ. बाबासाहेब आंबेडकर जयंती महोत्सव समिती, नातेपुते यांच्या वतीने आयोजित या कार्यक्रमात गायक साजन बेंद्रे आणि विशाल चव्हाण यांनी आपल्या प्रभावी सादरीकरणातून बाबासाहेबांच्या विचारांची, संघर्षाची आणि समतेच्या संदेशाची प्रभावी मांडणी केली. त्यांच्या सादरीकरणामुळे उपस्थितांमध्ये नवचैतन्य निर्माण झाले.
कार्यक्रमातील विशेष आकर्षण म्हणजे साजन बेंद्रे यांनी स्थानिक नेतृत्वाच्या कार्यावर आधारित सादर केलेले गीत ठरले. या गीतामुळे कार्यक्रमाला भावनिक रंग चढला आणि उपस्थितांकडून दाद मिळाली.
यावेळी महायुती घटक पक्षाचे पदाधिकारी, कार्यकर्ते तसेच नातेपुते येथील ग्रामस्थ मोठ्या संख्येने उपस्थित होते. कार्यक्रमातून सामाजिक एकात्मता आणि समतेचा संदेश देण्यात आला.
