मारेगाव (प्रतिनिधी) : मारेगाव तालुक्यातील चिंचोली बोटोनी सर्कलमधील सराटी गावातील महिलांनी अवैध दारूविक्रीविरोधात संताप व्यक्त करत मारेगाव पोलीस ठाण्यात निवेदन दिले आहे. गावात सुरू असलेल्या बेकायदेशीर दारूविक्रीमुळे महिलांवर व मुलांवर विपरीत परिणाम होत असल्याची तक्रार त्यांनी केली.
महिलांनी दिलेल्या माहितीनुसार, परिसरातील परवानाधारक दारूभट्टी गावापासून दूर असल्यामुळे तेथे जाणे-येणे सामान्य कामगारांना परवडत नाही. त्यामुळे गावातील काही लोकांनी याचा गैरफायदा घेत गावातच अवैध दारूविक्री सुरू केली. या प्रकारामुळे महिलांना त्रास वाढला असून तरुण पिढी व्यसनाधीन होण्याचा धोका निर्माण झाला आहे.
या पार्श्वभूमीवर सराटी गावातील संतप्त महिलांनी एकत्र येत सापळा रचून संबंधित दारूविक्रेत्यास रंगेहात पकडले. तसेच गावाच्या आसपास असलेल्या कोलाम समाजाच्या वस्त्यांमध्येही अशाच प्रकारे अवैध दारूविक्री होत असल्याची माहिती त्यांनी पोलिसांना दिली.
गावातील हा अवैध व्यवसाय कायमस्वरूपी बंद करण्यात यावा, अशी मागणी करत महिलांनी मारेगाव पोलीस ठाण्यात निवेदन सादर केले आहे. या प्रकरणी पोलिसांनी पुढील कारवाई सुरू केली असून नागरिकांनीही अशा गैरप्रकारांविरोधात सतर्क राहण्याचे आवाहन करण्यात येत आहे.
