मारेगाव (प्रतिनिधी) : मारेगाव तालुक्यातील साले भट्टी येथे चारचाकी वाहनाच्या धडकेत दुचाकी चालक जखमी झाल्याची घटना घडली. मोरेश्वर कैलास थेरे (वय ३४, रा. साले भट्टी) हे आपल्या मुलीला मारेगाव येथील इंग्लिश मीडियम शाळेत सोडण्यासाठी जात असताना हा अपघात झाला.
सकाळी सुमारे ९ वाजताच्या दरम्यान साले भट्टीहून शाळेकडे जात असताना वाळके यांच्या शेताजवळ समोरून भरधाव वेगाने येणाऱ्या टाटा मॅजिक (क्र. MH 29 CJ 3467) या वाहनाने त्यांना जोरदार धडक दिली. वाहन चालक गौरव गुलाब मोहितकर (रा. साले भट्टी) याचे गाडीवरील नियंत्रण सुटल्याने हा अपघात घडल्याची तक्रार मारेगाव पोलीस ठाण्यात देण्यात आली आहे.
या अपघातात मोरेश्वर थेरे यांचा पाय मोडला असून त्यांच्यावर उपचार सुरू आहेत. सुदैवाने त्यांच्या सोबत असलेली मुलगी या अपघातातून सुखरूप बचावली असून मोठी जीवितहानी टळली.
या प्रकरणी मारेगाव पोलिसांनी गुन्हा नोंद करून पुढील तपास सुरू केला असून तपास अधिकारी दिगंबर किनाके अधिक तपास करीत आहेत.
