बातमी :
जत (प्रतिनिधी – अरुण कोळी) : सांगली जिल्ह्यातील मुचंडी येथे भरलेल्या Daridev Jakkamadevi Yatra यात्रेत महानैवेद्याच्या दिवशी लाखो भाविकांनी दर्शनासाठी गर्दी केली. पहाटे निघालेल्या सबीना व पालखी मिरवणुकीत हजारो भक्त सहभागी झाले असून “दरिदेवाच्या नावानं चांगभलं, जक्कमा देवीच्या नावानं चांगभलं” अशा जयघोषात भंडाऱ्याची उधळण करण्यात आली.
महाराष्ट्रासह कर्नाटक, आंध्रप्रदेश, केरळ, तामिळनाडू व गोवा येथील भाविकांचे श्रद्धास्थान असलेल्या Shri Daridev Temple व Jakkamadevi Temple या देवस्थानांच्या यात्रेला दरवर्षी मोठ्या प्रमाणात प्रतिसाद मिळतो. यंदा देखील २ एप्रिलपासून सुरू झालेल्या यात्रेत हजारो स्टॉल उभारण्यात आले होते, तर देवस्थान परिसरात लावलेल्या वटवृक्षांमुळे निसर्गरम्य वातावरण निर्माण झाले होते.
यात्रेची परंपरा अशी की, प्रथम देवी जक्कमादेवीचे दर्शन घेऊन तिला महानैवेद्य अर्पण केला जातो आणि त्यानंतरच श्री दरिदेवाचे दर्शन घेतले जाते. या पारंपरिक श्रद्धेनुसार भाविकांनी पुरणपोळीचा नैवेद्य अर्पण करत मनोकामना व्यक्त केल्या. अनेक भाविकांनी नवस पूर्ण झाल्याबद्दल देवस्थानातील पायऱ्यांवर नारळ फोडून कृतज्ञता व्यक्त केली.
यात्रेचे आणखी एक वैशिष्ट्य म्हणजे “घुळी” ही प्रथा. यात कुटुंबातील एक पुरुष दरवर्षी यात्रेत सहभागी होऊन स्नान करून अंगावर अंबाडा वनस्पतीपासून तयार चाबकाचे फटकारे घेत देवाचा गजर करतो. तसेच महिला भाविकांनी तीन दगडांच्या चुलीवर पुरणपोळी तयार करून नैवेद्य अर्पण करताना भाविक भावनेने सहभाग नोंदवला.
ही यात्रा महाराष्ट्र-कर्नाटक सीमारेषेवर भरत असल्याने संपूर्ण नियोजन कर्नाटकातील कनमडी ग्रामपंचायतीमार्फत करण्यात आले होते. यात्रेत कोणताही अनुचित प्रकार घडू नये यासाठी कर्नाटक पोलिसांचा मोठा बंदोबस्त तैनात होता. भाविकांच्या सोयीसाठी दोन्ही राज्यांच्या हद्दीत तात्पुरते एसटी डेपो उभारण्यात आले होते.
उन्हाळ्याच्या पार्श्वभूमीवर यात्राकमिटीने विशेष व्यवस्था केली होती. दर्शन रांगेवर पत्रे टाकून सावलीची व्यवस्था, पायऱ्यांवर सतत पाणी सोडणे तसेच पिण्याच्या पाण्याची सोय करण्यात आली होती. त्यामुळे भाविकांनी समाधान व्यक्त केले.
पालखी भेटीनंतर भंडारा व खारीक-खोबऱ्यांची उधळण करत यात्रेची सांगता करण्यात आली. ही यात्रा सुरळीत पार पाडण्यासाठी दरिदेव देवस्थान यात्रा समिती कनमडी व मुचंडी यांनी मोठे परिश्रम घेतले.
