शहादा,दि.१२(प्रतिनिधी)
भारतरत्न डॉ. बाबासाहेब आंबेडकर यांच्या जयंती उत्सवाच्या पार्श्वभूमीवर शहादा शहरात जय्यत तयारी सुरू आहे. या उत्सवानिमित्त आयोजित महोत्सवाच्या पूर्वतयारीची आज विविध राजकीय पक्षांच्या पदाधिकाऱ्यांनी आणि सामाजिक कार्यकर्त्यांनी प्रत्यक्ष पाहणी केली. विशेष म्हणजे शांतता समितीच्या बैठकीत उपस्थित केलेल्या मागणीची तातडीने दखल घेत पुतळा परिसरात नवीन हॅलोजन दिवे बसवण्यात आले आहेत.
पोलीस प्रशासनातर्फे आयोजित शांतता कमिटीच्या बैठकीत आरपीआयचे जिल्हाध्यक्ष अनिल कुवर यांनी डॉ. बाबासाहेब आंबेडकर यांच्या पुतळ्याजवळील हॅलोजन लाईट आणि विद्युत रोषणाईचा प्रश्न मांडला होता. भाजपा जिल्हा उपाध्यक्ष प्रा. मकरंद पाटील यांनी या मागणीची तातडीने दखल घेतली. आज दुपारीच पुतळ्यासमोरील खांबांवर सहा नवीन हॅलोजन लाईट बसवण्यात आले असून परिसरातील विद्युत रोषणाईतही मोठी वाढ करण्यात आली आहे.पाहणी दौऱ्यावेळी शहरातील विविध क्षेत्रांतील मान्यवर उपस्थित होते,
ज्यात प्रामुख्याने भाजपाचे जिल्हा उपाध्यक्ष प्रा. मकरंद पाटील, शहराध्यक्ष नगरसेवक ज्ञानेश्वर चौधरी, बांधकाम सभापती संतोष वाल्हे, पाणीपुरवठा सभापती प्रदीप ठाकरे, राष्ट्रवादी काँग्रेस अजित पवार गटाचे शहराध्यक्ष सुरेंद्र कुवर,नगरसेवक हरीश पाटील, दीपक कोळी, ललित छाजेड, सागर मराठे, कल्पेश पटेल, मुनेश जगदेव, सामाजिक कार्यकर्ते हेमराज पवार,रमाशंकर माळी, अंकुर पाटील, योगेश डांमरे आदींची उपस्थिती होती.उपस्थित पदाधिकाऱ्यांनी पुतळा परिसराची बारकाईने पाहणी केली. जयंतीच्या दिवशी अनुयायांची होणारी गर्दी लक्षात घेता पिण्याचे पाणी, स्वच्छता आणि इतर आवश्यक व्यवस्था योग्य प्रकारे करण्याच्या सूचना संबंधित विभागांना देण्यात आल्या आहेत. महामानवाचा जन्मोत्सव उत्साहात आणि शिस्तबद्ध वातावरणात साजरा करण्यासाठी सर्वच पक्ष आणि संघटनांनी कंबर कसली आहे.
