आजरा (विशेष प्रतिनिधी) : भारतीय अंतराळ संशोधन संस्था ISRO मार्फत आयोजित ‘युवक वैज्ञानिक कार्यक्रम’ (युविका २०२६) अंतर्गत आजरा हायस्कूलची विद्यार्थिनी कुमारी वेदिका विजय पोतदार हिची देशपातळीवर निवड झाली आहे. या यशामुळे तिची तामिळनाडू येथील महेंद्रगिरी एरोस्पेस सेंटरमध्ये विशेष अभ्यास दौऱ्यासाठी निवड झाली असून, संपूर्ण आजरा तालुक्यात तिच्यावर कौतुकाचा वर्षाव होत आहे.
लाखो विद्यार्थ्यांमधून मिळविले यश
या प्रतिष्ठेच्या ‘युविका’ कार्यक्रमासाठी दरवर्षी देशभरातून लाखो विद्यार्थी प्रयत्न करतात. अत्यंत कठीण निवड प्रक्रियेनंतर यंदा संपूर्ण भारतातून केवळ ४५६ विद्यार्थ्यांची निवड करण्यात आली असून, त्यामध्ये वेदिकाने आपले स्थान मिळवून शाळेचा आणि जिल्ह्याचा नावलौकिक उंचावला आहे.
महेंद्रगिरी येथे संशोधनाचा अनुभव
१० मे ते २२ मे या कालावधीत होणाऱ्या या १२ दिवसांच्या अभ्यास दौऱ्यात वेदिकाला रॉकेट इंजिनची कार्यप्रणाली समजून घेणे, अंतराळ शास्त्रज्ञांशी संवाद साधणे तसेच विविध संशोधनात्मक प्रयोगांचा प्रत्यक्ष अनुभव घेण्याची संधी मिळणार आहे.
कठोर परिश्रमाचे फळ
या निवडीसाठी शालेय गुणवत्तेसोबतच सहशालेय उपक्रम, क्रीडा आणि ऑनलाइन चाचणी अशा विविध टप्प्यांतून जावे लागते. वेदिकाने सर्वच स्तरांवर उल्लेखनीय कामगिरी करत हे यश संपादन केले आहे.
मार्गदर्शनाचा मोठा वाटा
वेदिकाच्या यशात शाळेतील शिक्षकांचे मार्गदर्शन महत्त्वाचे ठरले. संस्थेचे अध्यक्ष अशोक अण्णा चराटी, मुख्याध्यापक ए. एल. तोडकर, उपमुख्याध्यापिका एच. एस. कामत तसेच पर्यवेक्षक ए. आर. व्हस्कोटी यांनी तिचे अभिनंदन करून पुढील वाटचालीस शुभेच्छा दिल्या.
“विज्ञानाची आवड आणि कष्टाची तयारी असेल तर ग्रामीण भागातील विद्यार्थीही जागतिक दर्जाच्या संस्थांपर्यंत पोहोचू शकतात,” असा विश्वास शाळा व्यवस्थापनाने व्यक्त केला.
