कोल्हापूर (प्रतिनिधी) : जिल्ह्यातील शिक्षक व शिक्षकेतर कर्मचाऱ्यांचे थकीत पगाराचा प्रश्न मार्गी लावण्यासाठी सोमवार, दि. २० एप्रिल रोजी पुणे शिक्षण संचालकांसमवेत बैठक घेण्यात येणार असल्याची माहिती आमदार जयंत आसगावकर यांनी दिली.
कोल्हापूर मुख्याध्यापक संघाच्या बैठकीत ते बोलत होते. यावेळी जिल्ह्यातील विविध शाळांचे मुख्याध्यापक, शिक्षक व शिक्षकेतर कर्मचारी मोठ्या संख्येने उपस्थित होते. अनेक कारणांमुळे पगार थकले असल्याने शिक्षकांमध्ये नाराजीचे वातावरण आहे.
बैठकीदरम्यान आमदार आसगावकर यांनी शिक्षण संचालक महेश पालकर यांच्याशी दूरध्वनीवरून चर्चा केली; मात्र समाधानकारक उत्तर न मिळाल्याने २० एप्रिल रोजी प्रत्यक्ष बैठक घेण्याचा निर्णय घेण्यात आला. शून्य पटाखालील शाळा, प्रयोगशाळा व ग्रंथपाल सहाय्यकांचे उन्नयन तसेच पगार बिल फॉरवर्ड न होण्याच्या अडचणी या बैठकीत मांडल्या जाणार आहेत.
यावेळी आमदार आसगावकर यांनी सांगितले की, शासन स्तरावर स्पष्ट आदेश नसतानाही काही अधिकाऱ्यांकडून पगार बिले पुढे पाठवली जात नाहीत, ही गंभीर बाब आहे. मुख्याध्यापकांचे पद संरक्षित करण्याचे आदेश असतानाही त्यांना अतिरिक्त ठरवण्याचा प्रयत्न होत असल्याने शाळांच्या प्रशासनावर परिणाम होत आहे.
बैठकीनंतर त्यांनी शिक्षणाधिकारी सुवर्णा सावंत यांची महावीर कॉलेज येथे भेट घेतली. तसेच पुणे शिक्षण विभागातील पवन जोशी यांच्याशीही संपर्क साधून पगार प्रक्रियेत येणाऱ्या अडचणींची माहिती दिली. या प्रश्नावर लवकरात लवकर तोडगा काढण्यासाठी सर्वांनी एकत्र येण्याचे आवाहन त्यांनी केले.
