चंदगड (प्रतिनिधी) : दि न्यू इंग्लिश स्कूल, चंदगड येथे डॉ. बाबासाहेब आंबेडकर जयंतीनिमित्त भव्य कार्यक्रमाचे आयोजन करण्यात आले. ज्ञानसाधनेचे महत्त्व अधोरेखित करत विद्यार्थ्यांना वाचन, चिंतन आणि अभ्यासाची प्रेरणा देण्यात आली.
कार्यक्रमाच्या अध्यक्षस्थानी शालेय समितीचे चेअरमन अॅड. एन. एस. पाटील होते. त्यांच्या हस्ते विद्यालयातील उपक्रमशील शिक्षक संजय साबळे लिखित ‘डॉ. बाबासाहेब आंबेडकर यांचे प्रेरणादायी विचार’ या पुस्तकाचे प्रकाशन करण्यात आले.
यावेळी अॅड. पाटील म्हणाले, “एखाद्या गोष्टीचे वेड घेतल्याशिवाय यश मिळत नाही. डॉ. आंबेडकरांचे विचार समाजाला दिशा देणारे आहेत. वाचनाची सवय लावल्यास अज्ञानातून मुक्ती मिळू शकते.”
कार्यक्रमाच्या प्रारंभी संस्थेचे उपाध्यक्ष एल. डी. कांबळे व खजिनदार अनंत सुतार यांच्या हस्ते डॉ. बाबासाहेब आंबेडकर यांच्या प्रतिमेचे पूजन करण्यात आले. प्राचार्य आर. पी. पाटील यांनी प्रास्ताविकातून बाबासाहेबांच्या कार्याचा आढावा घेत कार्यक्रमाची दिशा स्पष्ट केली.
लेखक संजय साबळे यांनी “वाचन हा प्रगतीचा पाया असून विद्यार्थीदशेतच वाचनाची सवय लागणे आवश्यक आहे,” असे प्रतिपादन केले. तसेच ज्येष्ठ संचालक प्रा. आर. पी. पाटील यांनी बाबासाहेबांच्या शिक्षणविषयक कार्याचा आणि ‘शिका, संघटित व्हा, संघर्ष करा’ या संदेशाचा विद्यार्थ्यांवर होणारा प्रभाव अधोरेखित केला.
कार्यक्रमात ग्रंथपाल शरद हदगल यांनी डॉ. आंबेडकरांच्या साहित्याचे विशेष पुस्तक प्रदर्शन आयोजित केले होते. विद्यार्थ्यांनी या प्रदर्शनाला उत्स्फूर्त प्रतिसाद दिला.
यावेळी प्राचार्य डॉ. एस. डी. गोरल, प्रा. ए. व्ही. धायगुडे, प्रा. एस. एम. शेख, जे. जी. पाटील, व्ही. के. गावडे, टी. व्ही. खंदाळे यांच्यासह शिक्षक, प्राध्यापक व शिक्षकेतर कर्मचारी उपस्थित होते. कार्यक्रमाचे सूत्रसंचालन प्रा. बी. सी. शिगांडे यांनी केले, तर उपप्राचार्य व्ही. एन. कांबळे यांनी आभार मानले.
ज्ञान, विचार आणि वाचन संस्कृतीला चालना देणारा हा कार्यक्रम विद्यार्थ्यांसाठी प्रेरणादायी ठरला.
