आजरा (प्रतिनिधी) : येथील श्री शिवतीर्थ परिसरात सकल हिंदू समाज, आजरा यांच्या वतीने आयोजित ‘विराट हिंदू संमेलन’ उत्साहात पार पडले. “एकता आणि धर्मरक्षण” या उद्देशाने झालेल्या या संमेलनाला पंचक्रोशीतून शेकडो हिंदू बांधवांनी उपस्थिती दर्शवत परिसर भगव्या ध्वजांनी आणि ‘जय श्रीराम’च्या घोषणांनी दुमदुमून गेला.
संमेलनाची सुरुवात सायंकाळी ५.३० वाजता व्यंकटराव हायस्कूल येथून भव्य शोभायात्रेने झाली. पारंपारिक वेशभूषेतील बालचमु, वारकरी सांप्रदाय, ब्रम्हकुमारीज संस्थेचा लक्ष्मी-नारायण रथ आणि लेझिम पथक हे यात्रेचे प्रमुख आकर्षण ठरले.
कार्यक्रमापूर्वी श्री शिवतीर्थ येथील अश्वारूढ मूर्तीला महंत सिद्धेश्वर स्वामीजी, भगवानगिरी महाराज, युवराज कुलकर्णी आणि बाळ महाराज यांच्या हस्ते अभिवादन करण्यात आले. तसेच सव्यसाची गुरुकुलम्, वेंगरुळ यांच्या युद्धकला प्रशिक्षण वर्गाकडून प्रात्यक्षिक सादर करण्यात आले.
मान्यवरांच्या हस्ते गोमाता पूजन, भारतमाता व छत्रपती शिवाजी महाराजांच्या प्रतिमांचे पूजन करून कार्यक्रमाची औपचारिक सुरुवात झाली. बेलबाग आश्रमचे सिद्धेश्वर स्वामी यांनी मराठी व कन्नड भाषेत आशीर्वचन देत “स्वधर्म रक्षणासाठी संघटित होणे काळाची गरज आहे,” असे प्रतिपादन केले.
यानंतर युवराज कुलकर्णी यांनी राष्ट्रीय स्वयंसेवक संघाचा इतिहास व कार्यपद्धती यावर भाष्य करत पर्यावरण, कुटुंब प्रबोधन, स्वबोध, नागरी कर्तव्य आणि सामाजिक समरसता या पंचपरिवर्तन मुद्द्यांवर प्रकाश टाकला. भगवानगिरी महाराज यांनी संत परंपरेचा आढावा घेत उपस्थितांचे कौतुक केले.
मुख्य वक्ते बाळ महाराज (इचलकरंजी) यांनी हिंदू समाजाने अधिक सजग राहण्याची गरज व्यक्त करत एकतेचे महत्त्व अधोरेखित केले. कार्यक्रमाच्या शेवटी अभिषेक रोडगी यांनी आभार मानले व ‘वंदे मातरम्’ने सांगता झाली. उपस्थितांसाठी प्रसादाचीही व्यवस्था करण्यात आली होती.
संमेलनादरम्यान पोलिसांनी चोख बंदोबस्त ठेवला होता. स्वयंसेवकांनी पार्किंग व पिण्याच्या पाण्याची व्यवस्था शिस्तबद्धपणे हाताळली. कोणताही अनुचित प्रकार न घडता कार्यक्रम शांततेत पार पडला.
या संमेलनामुळे शहरात धार्मिक उत्साहाचे वातावरण निर्माण झाले असून भविष्यातही अशा उपक्रमांचे आयोजन करण्याचा निर्धार आयोजकांनी व्यक्त केला. यावेळी रमेश सुतार, ललित कांबळे, जांभळे गुरुजी, तानाजी बुरुड, नागराज रायकर यांसह विविध हिंदुत्ववादी संघटना, तरुण मंडळे व नागरिक मोठ्या संख्येने उपस्थित होते.
