कन्नड (तालुका प्रतिनिधी) :
डॉ. बाबासाहेब आंबेडकर यांच्या जयंतीनिमित्त कन्नड शहरात नगराध्यक्ष फरीन बेगम जावेद सेठ यांच्या पुढाकारातून संविधान वाटपाचा उपक्रम राबविण्यात आला. शहरातील मध्यवर्ती ठिकाणी उभारलेल्या डॉ. बाबासाहेब आंबेडकर यांच्या अर्धाकृती पुतळ्यास अभिवादन करून उपस्थित समाजबांधवांना संविधानाच्या प्रती वितरित करण्यात आल्या.
यावेळी नगराध्यक्ष फरीन बेगम जावेद सेठ यांनी आपल्या भाषणात, “बाबा हम तुम पर नाज करते हैं, तुम्हारी कलम के जोर पर ही तो हम राज करते हैं,” असे म्हणत बाबासाहेबांविषयी कृतज्ञता व्यक्त केली.
तसेच, बाबासाहेबांचा पुतळा स्थापनेपासून उघड्यावर असल्याचे नमूद करत, “जोपर्यंत मी नगराध्यक्ष पदावर आहे, तोपर्यंत या पुतळ्यासाठी छताचे काम पूर्ण करेन,” अशी ग्वाही त्यांनी दिली. त्यांच्या या घोषणेचे उपस्थित नागरिकांनी टाळ्यांच्या गजरात स्वागत केले.
या उपक्रमामुळे भीम जयंतीला सामाजिक व वैचारिक अधिष्ठान मिळाले असून, संविधानाचे महत्त्व जनतेपर्यंत पोहोचवण्याचा एक प्रभावी प्रयत्न ठरला.
