बीड जिल्हा (प्रतिनिधी)
अत्यंत प्रतिकूल परिस्थितीवर मात करत जिद्द, चिकाटी आणि प्रामाणिक सेवेच्या जोरावर भारतीय पोलीस दलात उल्लेखनीय कामगिरी करणाऱ्या वैशाली अभय शिंदे यांची सहाय्यक फौजदार (ASI) पदी निवड झाली आहे.
या यशाबद्दल शिवसेना (उद्धव बाळासाहेब ठाकरे) पक्षाचे शिरूर कासार तालुकाप्रमुख सोपान (काका) मोरे यांनी शिरूर पोलीस स्टेशन येथे त्यांचा सहकुटुंब जंगी सत्कार केला.
वैशाली शिंदे यांनी १ सप्टेंबर २००० रोजी पोलीस दलात भरती होऊन आपल्या सेवेला सुरुवात केली होती. गरिबीच्या पार्श्वभूमीतून आलेल्या असूनही त्यांनी कष्ट आणि समर्पणाच्या जोरावर पोलीस दलात आपली वेगळी ओळख निर्माण केली. दीर्घ आणि कर्तव्यदक्ष सेवेनंतर १० एप्रिल २०२६ रोजी त्यांची सहाय्यक फौजदार पदी पदोन्नती झाली.
या निमित्ताने सोपान (काका) मोरे यांनी पोलीस स्टेशनमध्ये उपस्थित राहून त्यांचा सन्मान केला. यावेळी सविता सोपान मोरे यांनी वैशाली शिंदे यांना हळदी-कुंकू लावून, भगवी शाल, श्रीफळ आणि पुष्पगुच्छ देऊन गौरव केला.
या प्रसंगी पोलीस निरीक्षकांसह सर्व पोलीस अधिकारी व कर्मचारी मोठ्या संख्येने उपस्थित होते. मान्यवरांनी वैशाली शिंदे यांचा प्रवास ग्रामीण भागातील तरुणींना प्रेरणादायी असल्याचे गौरवोद्गार काढले.
कार्यक्रम अत्यंत उत्साहपूर्ण व अभिमानाच्या वातावरणात पार पडला.
