अलिबाग/पनवेल: (पनवेल प्रतिनिधी): समाजातील विविध स्तरावर आपल्या सामाजिक आणि जनहितार्थ कार्याचा ठसा उमटवणाऱ्या रेवदंडा येथील ‘डॉ. श्री. नानासाहेब धर्माधिकारी प्रतिष्ठान’च्या वतीने रायगड पोलीस दलाला ६१५ बॅरिकेड्स आणि १६ ब्रेथ ॲनालायझर मशीनचे नुकतेच वाटप करण्यात आले.
रस्ते सुरक्षा आणि वाहतूक व्यवस्थापन अधिक सक्षम करण्याच्या उद्देशाने हे साहित्य प्रतिष्ठानच्या वतीने पोलीस प्रशासनाला देण्यात आले आहे. प्रतिष्ठानचे डॉ. सचिन दादा धर्माधिकारी, श्री. उमेश दादा धर्माधिकारी आणि श्री. राहुल दादा धर्माधिकारी यांच्या शुभहस्ते रायगडच्या जिल्हा पोलीस अधीक्षक श्रीमती आँचल दलाल यांच्याकडे हे साहित्य सन्मानपूर्वक सुपूर्द करण्यात आले.
रायगड जिल्ह्यात सातत्याने वाढणारी वाहनांची संख्या, सण-उत्सव आणि पर्यटनाच्या काळात होणारी गर्दी लक्षात घेता, पोलिसांकडे बॅरिकेड्सची मोठी गरज असते. प्रतिष्ठानने दिलेल्या ६१५ बॅरिकेड्समुळे गर्दीचे नियोजन आणि बंदोबस्तासाठी पोलीस दलाला मोठी मदत होणार आहे. तसेच, मद्यपान करून वाहन चालवणाऱ्यांवर आळा घालण्यासाठी १६ अत्याधुनिक ‘ब्रेथ ॲनालायझर’ मशीन्स उपयुक्त ठरणार आहेत, ज्यामुळे अपघातांचे प्रमाण कमी होण्यास मदत होईल.
यावेळी बोलताना पोलीस अधीक्षक श्रीमती आँचल दलाल यांनी प्रतिष्ठानच्या या सामाजिक बांधिलकीबद्दल कृतज्ञता व्यक्त केली. “पोलीस दल अहोरात्र जनतेच्या सुरक्षेसाठी कार्य करत असते. डॉ. श्री. नानासाहेब धर्माधिकारी प्रतिष्ठानने दिलेले हे साहित्य पोलिसांची कार्यक्षमता वाढवण्यासाठी मोलाचे ठरेल,” असे त्यांनी नमूद केले.
डॉ. श्री. नानासाहेब धर्माधिकारी प्रतिष्ठानने आजवर स्वच्छता अभियान, वृक्षारोपण, आरोग्य शिबिरे आणि शैक्षणिक मदतीसोबतच प्रशासनाला वेळोवेळी असे सहकार्य करून एक नवा आदर्श घालून दिला आहे. या उपक्रमाचे सर्व स्तरांतून कौतुक होत आहे.
