माहूर (प्रतिनिधी)
माहूर तालुक्यातील जुनापाणी नजीक असलेल्या शारदा कंस्ट्रक्शन कंपनीच्या साईटवर अत्यंत धक्कादायक घटना उघडकीस आली असून, झोपलेल्या एका निष्पाप ऑपरेटरचा मातीच्या ढिगाऱ्याखाली दबून मृत्यू झाल्याची माहिती समोर आली आहे. या घटनेमुळे परिसरात मोठी खळबळ उडाली असून हा प्रकार घात की अपघात, याबाबत विविध तर्क-वितर्कांना उधाण आले आहे.
मिळालेल्या माहितीनुसार, झारखंड राज्यातील जोंगी (ता. चंदवारा, जि. कोंडरमा) येथील अजीत यादव (वय ३५) हा संबंधित साईटवर ऑपरेटर म्हणून कार्यरत होता. साईटवर काम करणाऱ्या मजुरांच्या म्हणण्यानुसार, मागील दहा दिवसांपासून कंपनीकडून डिझेल बचतीसाठी जनरेटर बंद ठेवण्यात येत होते. त्यामुळे रात्रीच्या वेळी लाईट व पंख्यांची सुविधा नसल्याने मजुरांना उघड्यावर झोपावे लागत होते.
दि. १ मे रोजी रात्री सुमारे ९ वाजता अजीत यादव मोकळ्या जागेत झोपला असताना, त्याच ठिकाणी मातीने भरलेले टिप्पर येऊन माती टाकण्यात आली. दुर्दैवाने, ही माती थेट त्याच्यावर पडल्याने तो ढिगाऱ्याखाली दबला. मात्र, रात्रीच्या अंधारामुळे ही बाब कुणाच्याही लक्षात आली नाही.
दि. २ मे रोजी सकाळी साडेआठच्या सुमारास जेसीबीद्वारे माती हलविताना अजीत यादव याचे पाय दिसून आल्याने ही घटना उघडकीस आली. त्यानंतर माहूर पोलीस घटनास्थळी दाखल झाले असून मृतदेह ग्रामीण रुग्णालयात शवविच्छेदनासाठी हलविण्यात आला आहे. वृत्त लिहीपर्यंत नातेवाईक येण्याची प्रतीक्षा सुरू असल्याने शवविच्छेदन प्रक्रिया विलंबित होती.
या प्रकरणात अद्याप गुन्हा नोंदविण्यात आलेला नसून मृत्यूचे नेमके कारण शवविच्छेदन अहवालानंतर स्पष्ट होणार आहे. मात्र, प्राथमिक माहिती व परिस्थितीवरून हा प्रकार गंभीर निष्काळजीपणाचा असल्याचे बोलले जात आहे.
दरम्यान, या घटनेमुळे अनेक प्रश्न उपस्थित होत आहेत. साईटवर माती नेमकी कशासाठी आणली जात होती, ती रात्रीच का टाकली जात होती, रस्त्याच्या कामासाठी मुरमाऐवजी मातीचा वापर का करण्यात येत होता, अशा प्रश्नांची चर्चा रंगली आहे.
विशेष म्हणजे, केवळ खर्च वाचवण्यासाठी जनरेटर बंद ठेवणे आणि त्यातून एका कामगाराचा जीव जाणे, ही बाब संतापजनक असल्याची प्रतिक्रिया मजूर व स्थानिकांकडून व्यक्त होत आहे. या संपूर्ण प्रकरणाची सखोल चौकशी करून दोषींवर कठोर कारवाई करावी, अशी मागणी होत आहे.
