शहादा, दि. 03 (प्रतिनिधी):
शहादा येथील अवघ्या सात वर्षीय प्रनिका पाटील हिने आपल्या बुद्धीचातुर्याच्या जोरावर क्रीडा क्षेत्रात उल्लेखनीय यश मिळवत राज्यस्तरीय बुद्धिबळ स्पर्धेसाठी निवड निश्चित केली आहे. नंदुरबार जिल्हा चेस सर्कल यांच्या वतीने आयोजित जिल्हास्तरीय निवड चाचणी स्पर्धेत तिने घवघवीत कामगिरी करत पुणे येथे होणाऱ्या स्पर्धेसाठी पात्रता मिळवली.
ही स्पर्धा स्थानिक इंदुबाई गोसावी वाचनालयात पार पडली असून जिल्ह्यातील ४४ खेळाडूंनी विविध गटांत सहभाग नोंदवला होता. स्विस लीग पद्धतीने खेळवण्यात आलेल्या या स्पर्धेत ७ वर्षांखालील गटात चुरशीचे सामने रंगले. प्रनिकाने संयम आणि कौशल्य दाखवत चारही डाव जिंकून निर्विवाद यश संपादन केले.
प्रनिका ही शहादा येथील शल्यचिकित्सक डॉ. प्रफुल्ल पाटील यांची कन्या असून, औरंगपूर येथील प्रगतीशील शेतकरी सुरेश पाटील यांची नात आहे. अल्पवयातच मिळवलेल्या या यशामुळे तिचे सर्व स्तरातून कौतुक होत आहे.
स्पर्धेच्या समारोपप्रसंगी डॉ. नरेंद्र गोसावी, संगीता लखोटीया व सुभाष मोरावकर यांच्या हस्ते विजेत्यांना पारितोषिके देऊन गौरविण्यात आले. मुख्य पंच म्हणून संदीप साळुंके यांनी काम पाहिले, तर स्पर्धेच्या यशस्वी आयोजनासाठी ऋषिकेश सोनार, दीपक लाखोटीया आणि सोनाली जगताप यांनी विशेष परिश्रम घेतले.
प्रनिकाच्या या यशामुळे संपूर्ण जिल्ह्याचा गौरव वाढला असून पुण्यात होणाऱ्या राज्यस्तरीय स्पर्धेसाठी तिला सर्व स्तरातून शुभेच्छांचा वर्षाव होत आहे.
