वसंतराव नाईक महाविद्यालयात तृतीय वर्ष भौतिकशास्त्र अभ्यासक्रम पुनर्रचना कार्यशाळा संपन्न

शहादा, दि. 03 (प्रतिनिधी):
येथील वसंतराव नाईक कला, विज्ञान व वाणिज्य महाविद्यालयात भौतिकशास्त्र विभाग आणि कवयित्री बहिणाबाई चौधरी उत्तर महाराष्ट्र विद्यापीठ, जळगाव यांच्या संयुक्त विद्यमाने तृतीय वर्ष विज्ञान (भौतिकशास्त्र – सत्र सहावे) या वर्गासाठी राष्ट्रीय शैक्षणिक धोरण २०२० अनुषंगाने एकदिवसीय अभ्यासक्रम पुनर्रचना कार्यशाळेचे आयोजन करण्यात आले.

कार्यक्रमाच्या उद्घाटनप्रसंगी कर्मसाक्षी नानासाहेब प्रेमचंद जाधव संकुलाचे प्रशासकीय प्रमुख प्रा. डॉ. हिमांशुभाऊ जाधव अध्यक्षस्थानी होते. व्यासपीठावर भौतिकशास्त्र अभ्यास मंडळाचे अध्यक्ष प्रा. डॉ. जे. व्ही. साळी, तसेच सदस्य प्राचार्य डॉ. उदय जगताप, प्राचार्य आर. एस. खडायते, प्रा. डॉ. संजय घोष, प्रा. डॉ. अविनाश पाटील, प्रा. डॉ. रवी बावणे, प्रा. डॉ. एस. डी. बागुल, प्रा. डॉ. नितीन बाविस्कर, प्रा. डॉ. प्रिती रावताळे आणि आयक्यूएसी समन्वयक प्रा. डॉ. बी. वाय. बागुल उपस्थित होते. कार्यक्रमाची सुरुवात बहिणाबाई चौधरी व कै. नानासाहेब यांच्या प्रतिमांना अभिवादन करून झाली.

मार्गदर्शन करताना प्रा. डॉ. जे. व्ही. साळी यांनी सांगितले की, नवीन शैक्षणिक धोरणानुसार विद्यार्थ्यांना रोजगाराभिमुख, संशोधनाधारित व जागतिक दर्जाचे शिक्षण देण्यासाठी अभ्यासक्रमात बदल करणे आवश्यक आहे. ज्ञानाधारित अर्थव्यवस्था व आत्मनिर्भर भारतासाठी विद्यार्थ्यांची विचारशक्ती आणि संशोधनवृत्ती विकसित करणारा अभ्यासक्रम असावा, असे त्यांनी नमूद केले.

प्राचार्य डॉ. उदय जगताप यांनी विद्यार्थी-केंद्रित अभ्यासक्रमावर भर देत भौतिकशास्त्रातील सिद्धांत व प्रात्यक्षिक यांचा समन्वय आवश्यक असल्याचे सांगितले. अध्यक्षीय समारोपात प्रा. डॉ. हिमांशुभाऊ जाधव यांनी स्पर्धेच्या युगात अभ्यासक्रम अधिक सक्षम व स्पर्धात्मक असावा, असे मत व्यक्त केले.

कार्यशाळेच्या पुढील सत्रात तज्ज्ञांनी पुनर्रचित अभ्यासक्रमाचे सादरीकरण केले व त्यावर सविस्तर चर्चा करण्यात आली. कार्यक्रमाचे प्रास्ताविक प्रा. डॉ. बी. वाय. बागुल यांनी केले, सूत्रसंचालन प्रा. डॉ. ए. सी. चव्हाण यांनी केले तर आभार प्रदर्शन प्रा. डॉ. डी. वाय. पाटील यांनी केले.

या कार्यशाळेच्या यशस्वी आयोजनासाठी प्रा. डॉ. राजेश सोनवणे, प्रा. राम हजारी, प्रा. गणेश पडघन यांच्यासह सर्व प्राध्यापक व कर्मचाऱ्यांनी विशेष परिश्रम घेतले. कार्यशाळेस विद्यापीठ परिसरातील भौतिकशास्त्र विषयाचे प्राध्यापक मोठ्या संख्येने उपस्थित होते.