लहान-मोठ्या क्षेत्रातील कामगारांचा करण्यात आला सन्मान
पनवेल / प्रतिनिधी
पनवेल येथील पत्रकार मित्र असोसिएशनतर्फे दिनांक १ मे रोजी महाराष्ट्र दिन आणि आंतरराष्ट्रीय कामगार दिनानिमित्त विविध क्षेत्रांतील कामगारांचा सत्कार करून त्यांच्या योगदानाचा सन्मान पत्रकार मित्र असोसिएशन संस्थेतर्फे करण्यात आला. यामध्ये औद्योगिक कामगार, कचरा वेचक, सुरक्षारक्षक आणि घरेलू कामगार, गॅस सिलेंडर वाहक यांसारख्या लहान-मोठ्या क्षेत्रातील कामगारांचा पत्रकार मित्र असोसिएशनतर्फे कामगार दिनाचे औचत्य साधून सन्मान करण्यात आला.
यावेळी कामगार क्षेत्रातील अनेक कामगार नेते तसेच कामगारांसाठी आयुष्यभर झटणाऱ्या नामांकित मंडळींना श्रमविर सन्मान पुरस्कार देऊन त्यांचा यथाशक्तीप्रमाणे गौरव करण्यात आला. यावेळी राष्ट्रवादी काँग्रेस पक्षाचे नेते व चर्मकार तसेच गटई कामगारांसाठी आपले आयुष्य खर्ची घालणारे शिवदास कांबळे यांनी आपल्या कार्याचा आलेख भाषण करताना मांडला व कामगार दिनाचे महत्व समजावून संगितले तसेच म्युनिसिपल एम्प्लॉईज युनियनचे सरचिटणीस अनिल जाधव व उपस्थितांनी कामगार दिनानिमित्त प्रबोधनकारक भाषण केले व कार्यक्रमाबद्दल आयोजकांचे आभार व्यक्त केले.
पत्रकार मित्र असोसिएशनचे संस्थापक केलेलं महाडिक यांनी यावेळी उपस्थितांसमोर कामगार क्षेत्रात झालेला बदल, कामगार संघटनांना लागलेले वेगळे वळण, तसेच महापालिकेतील कर्मचाऱ्यांची आजची अवस्था, पनवेल महापालिकेत आजहि अग्निशामक दलाच्या जवानांना न मिळालेले फायर सूट किट याबाबत मत व्यक्त करून बदल घडवावा अशी विनंतीही उपस्थित नेत्यांना केली.
सदर कार्यक्रमास शिवदास कांबळे, म्युनिसिपल एम्प्लॉईज युनियनचे सरचिटणीस अनिल जाधव, धर्मवीर कामगार सेनेच्या अध्यक्षा प्रियांकाताई गाडे, उद्योजक वैभव ढवळे, डॉ. पल्लवी पाटील, स्त्री शक्ती फाउंडेशनच्या अध्यक्षा विजया कदम, सुप्रसिद्ध डॉक्टर श्रुणाल जाधव, पत्रकार मित्र असोसिएशनचे संस्थापक केवल महाडिक, अध्यक्ष प्रोफेसर एस. क्रिष्णकुमार, कार्याध्यक्ष नितीन जोशी, सहसचिव प्रवीण शेंडे, खजिनदार राजन शेलार, ग्रामीण अध्यक्ष शशिकांत दळवी, निखिल गुंदेचा यांच्यासह सदस्यवर्ग उपस्थित होते.
