पातुर (प्रतिनिधी) : ग्रामपंचायतींना मिळालेल्या शासकीय निधीचा हिशोब मागूनही माहिती न मिळाल्याने संतप्त झालेल्या सामाजिक कार्यकर्त्याने पातुर पंचायत समिती कार्यालयात अर्धनग्न आंदोलन करत प्रशासनाचा निषेध नोंदवला. या घटनेमुळे परिसरात मोठी खळबळ उडाली आहे.
सायवनी येथील सामाजिक कार्यकर्ते विजय टाले यांनी ४ मे रोजी पंचायत समिती कार्यालयात जाऊन गटविकास अधिकाऱ्यांची भेट घेण्याचा प्रयत्न केला. मात्र अधिकारी अनुपस्थित असल्याने त्यांनी संताप व्यक्त करत अर्धनग्न अवस्थेत आंदोलन सुरू केले.
मिळालेल्या माहितीनुसार, पातुर पंचायत समिती अंतर्गत गोंधळवाडी, तांदूळी बु. आणि देऊळगाव या ग्रामपंचायतींना १४ व १५ व्या वित्त आयोगाचा निधी प्राप्त झाला होता. या निधीचा वापर कशासाठी झाला याची माहिती मिळवण्यासाठी विजय टाले यांनी वारंवार पाठपुरावा केला होता. मात्र संबंधित अधिकाऱ्यांकडून माहिती देण्यास टाळाटाळ होत असल्याचा आरोप त्यांनी केला आहे.
या आंदोलनामुळे पंचायत समिती कार्यालयात काही काळ गोंधळाचे वातावरण निर्माण झाले. घटनेची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणली. पोलिसांच्या मध्यस्थीने प्रभारी गटविकास अधिकाऱ्यांशी संपर्क साधून प्रकरणाची दखल घेण्याचे आणि योग्य ती कारवाई करण्याचे आश्वासन देण्यात आले.
प्रशासनाकडून ठोस आश्वासन मिळाल्यानंतर विजय टाले यांनी आंदोलन तात्पुरते स्थगित केले आहे. दरम्यान, या घटनेमुळे पंचायत समितीच्या कामकाजातील पारदर्शकतेबाबत प्रश्नचिन्ह उपस्थित झाले असून नागरिकांकडून याची सखोल चौकशी करण्याची मागणी होत आहे.
