उपळाई ठोंगे : उपळाई ठोंगे गावात कथित बोगस डॉक्टरच्या उपचारामुळे एका नागरिकाचा मृत्यू झाल्याची गंभीर घटना समोर आली असून गावकऱ्यांत संताप व्यक्त केला जात आहे.
मिळालेल्या माहितीनुसार, तानाजी नरहरी सुतार यांचा संशयित चुकीच्या उपचारामुळे मृत्यू झाल्याचे सांगितले जात आहे. या घटनेनंतर त्यांच्या नातेवाईकांसह गावकऱ्यांनी तीव्र हळहळ व्यक्त करत संबंधितावर कठोर कारवाईची मागणी केली आहे.
गावकऱ्यांच्या आरोपानुसार, ‘डॉ. पाठक’ नावाने ओळखला जाणारा व्यक्ती प्रत्यक्षात अधिकृत डॉक्टर नसून, तो कोणत्याही वैद्यकीय पात्रतेशिवाय उपचार करत असल्याचा आरोप आहे. साध्या आजारांवरही योग्य माहिती नसताना औषधांचा ओव्हरडोस देणे तसेच इंजेक्शन देण्याच्या प्रकारांमुळे अनेक रुग्णांना गंभीर दुष्परिणामांना सामोरे जावे लागले आहे.
काही नागरिकांनी असा आरोप केला आहे की, दिलेल्या इंजेक्शनमुळे रुग्णांच्या शरीरावर गाठी निर्माण झाल्या असून, पुढील उपचारासाठी त्यांना बार्शी येथील रुग्णालयात दाखल करावे लागले. काही प्रकरणांमध्ये परिस्थिती गंभीर बनल्याचाही दावा करण्यात येत आहे.
या पार्श्वभूमीवर ग्रामस्थांनी प्रशासनाने तातडीने दखल घेऊन संबंधित व्यक्तीची चौकशी करून योग्य ती कारवाई करावी, अशी मागणी केली आहे. “अशा बोगस डॉक्टरमुळे संपूर्ण गावाच्या आरोग्याला धोका निर्माण झाला आहे,” अशी भावना नागरिकांनी व्यक्त केली.
👉 या प्रकरणात प्रशासनाकडून अद्याप अधिकृत प्रतिक्रिया आलेली नसून, तपासानंतरच पुढील बाबी स्पष्ट होणार आहेत.
