शैक्षणिक, सामाजिक व पर्यावरण क्षेत्रातील उल्लेखनीय कार्याची दखल; अमरावतीत ‘आस्था-दीप संमेलन २०२६’ उत्साहात संपन्न
अमरावती / प्रतिनिधी : समाजातील अंधार दूर करून शिक्षण, प्रबोधन, संघटन आणि सहकाराच्या माध्यमातून परिवर्तनाची ज्योत प्रज्वलित करण्याच्या उद्देशाने आयोजित करण्यात आलेले ‘आस्था-दीप संमेलन २०२६’ शनिवार, दि. १४ नोव्हेंबर रोजी अमरावती येथील जोशी सभागृहात उत्साहपूर्ण वातावरणात संपन्न झाले.
या संमेलनात लोणार सरोवर, जिल्हा बुलढाणा येथील कै. कु. दुर्गा क. बनमेरू विज्ञान महाविद्यालयाचे प्राचार्य डॉ. प्रकाश बनमेरू यांना शैक्षणिक क्षेत्रातील उल्लेखनीय कार्याबद्दल राज्यस्तरीय ‘आस्था-दीप’ पुरस्काराने सन्मानित करण्यात आले. प्रतिकूल परिस्थितीवर मात करून शैक्षणिक क्षेत्रात स्वतःची वेगळी ओळख निर्माण करत त्यांनी केलेले कार्य, तसेच सामाजिक आणि पर्यावरण क्षेत्रातील योगदानाची दखल घेऊन त्यांचा विशेष व्यक्तिमत्त्व म्हणून गौरव करण्यात आला.
कार्यक्रमाच्या अध्यक्षस्थानी आस्था नागरी सहकारी पतसंस्थेचे संस्थापक अध्यक्ष तथा अमरावती विभागाचे सेवानिवृत्त अधीक्षक अभियंता प्रकाश नागपुरकर होते. संमेलनाचे उद्घाटन सामाजिक कार्यकर्त्या तथा सत्यशोधक व्याख्यात्या प्रा. डॉ. नीलिमा मुळे यांच्या हस्ते झाले. मार्गदर्शक म्हणून दैनिक तरुण भारत, नागपूरच्या संचालिका तथा महिला समन्वय प्रमुख, विदर्भ प्रांताच्या मीरा कडवे उपस्थित होत्या. मुंबई येथील सचिन परब यांचीही विशेष उपस्थिती होती.
यावेळी विविध क्षेत्रांत उल्लेखनीय कार्य करणाऱ्या मान्यवरांना पुरस्कार देऊन गौरविण्यात आले. उच्च पदप्राप्त व्यक्ती गौरव पुरस्काराने मुंबई येथील कस्टम विभागाचे आयटी प्रमुख संजय वैद्य यांना सन्मानित करण्यात आले. विशेष शैक्षणिक व सामाजिक कार्य गौरव पुरस्कार नांदगाव खंडेश येथील शिवछत्रपती पुरस्कारप्राप्त शिक्षक तथा एकलव्य धनुर्विद्या अकॅडमीचे संस्थापक सदानंद जाधव यांना प्रदान करण्यात आला.
कार्यक्रमाची सुरुवात ‘वंदे मातरम्’ने झाली. प्रा. अंकुश मानकर यांनी सूत्रसंचालन केले. शिवा पिंपळकर यांनी प्रास्ताविकातून आस्था ग्रुपच्या कार्याचा आणि संमेलन आयोजनामागील उद्देशाचा परिचय करून दिला. आस्था ग्रुपचे संस्थापक गजानन अंजनकर यांनी आभार प्रदर्शन केले. समारोपप्रसंगी माया नांदूरकर यांनी भारतीय संविधानाचे वाचन करून संविधानातील मूल्यांचा जागर केला.
‘चलो जलाऐ दीप वहाँ, जहाँ अभी भी अंधेरा है’ या प्रेरणादायी विचाराला केंद्रस्थानी ठेवून आयोजित या संमेलनातून शिक्षण, संस्कार, महिला सक्षमीकरण, सामाजिक बांधिलकी आणि संविधानिक मूल्यांचा संदेश देण्यात आला. आस्था ग्रुप महाराष्ट्राच्या वतीने आयोजित हे संमेलन समाजपरिवर्तनाच्या दिशेने प्रेरणा देणारे ठरले.










