भोर (प्रतिनिधी) – भोर तालुक्यातील नसरापूर येथे घडलेल्या गंभीर घटनेच्या पार्श्वभूमीवर माजी आमदार संग्राम थोपटे यांनी मुंबईतील सह्याद्री अतिथीगृह येथे मुख्यमंत्री देवेंद्र फडणवीस यांची भेट घेतली. या भेटीत आरोपीवर तात्काळ व कठोर कारवाई करण्याची मागणी करत निवेदन सादर करण्यात आले.
प्रमुख मागण्या
या निवेदनामध्ये खालील मागण्या ठामपणे मांडण्यात आल्या:
- प्रकरणाची सुनावणी फास्ट ट्रॅक कोर्टात घेऊन पीडित कुटुंबाला त्वरित न्याय द्यावा
- सरकारी वकील म्हणून उज्ज्वल निकम यांची नियुक्ती करावी
- पीडित मुलीच्या आईला शासकीय नोकरी देऊन आर्थिक मदत करावी
मान्यवरांची उपस्थिती
या भेटीवेळी आमदार राहुल कुल, जिल्हा परिषद सदस्या स्वरूपा थोपटे, जिल्हा परिषद सदस्य पोपटराव सुके, नसरापूरच्या सरपंच उषा कदम, उपसरपंच इरफान मुलाणी यांच्यासह विविध पदाधिकारी, सामाजिक कार्यकर्ते आणि ग्रामस्थ उपस्थित होते.
एकमुखी मागणी
या प्रकरणात पीडितेला लवकरात लवकर न्याय मिळावा आणि दोषींवर कठोर कारवाई व्हावी, अशी सर्व उपस्थितांची एकमुखी मागणी करण्यात आली. प्रशासनाने या प्रकरणाची गांभीर्याने दखल घेऊन तातडीने योग्य निर्णय घ्यावा, अशी अपेक्षा व्यक्त केली जात आहे.
